Mizoram State Anti-Tobacco Day pualin Serchhip-ah Gutkha products tihchhiat a ni

Mizoram State Anti-Tobacco Day vawi 7-na pualin nimin khan Serchhip-ah Anti-Tobacco Squad leh Health Department hnuaia Food and Drug Administration ten an mankhawm Gutkha Products chi hrang hrangte tihchhiat a ni.

Heng Gutkha Products tihchhiatna puala inkhawm tawi Serchhip District Hospital Tobacco Cessation Clinic (TCC)-a neih hi Food & Drug Administration-a Asst. Director, Sarah Laldintluangi chuan hmanpuiin mipui ten ei leh in thianghlim zawk an ei-a an in theihna tura kawng hrang hranga hma an lak thin thu sawiin, Mizote chuan tunhma atangin zuk leh hmuam kan tih nasat thin thu leh tunah chuan heng zuk leh hmuam, Vaihlo leh a kaihhnawih te hman chu Dan bawhchhiatna a nih tawh thu a sawi a. Hei mai bakah hian zuk leh hmuam chu kan hriselna tichhe theitu a nih avangin tih loh a pawimawh thu leh hmeichhia tan phei chuan a hlauhawm lehzual thu a sawi a. Heng Vaihlo leh a kaihhnawih atanga thil siamchhuah te hi khap ni mah se hmang duh leh lei duh an awm avangin Supply a awm zel thu pawh sawiin, hei vang hian hetiang thil zawrh leh hman te hi Dan bawhchhiatna a ni tih mipuite pawhin an hriat a pawimawh thu a sawi bawk.

Heng Vaihlo leh a kaihhnawih atanga thil siamchhuah an man tihralna puala inkhawm hi National Tobacco Control Programme (NTCP)-a Serchhip District Consultant, K. Hmingthangsangi chuan kaihruaiin heng nimin-a Gutkha Products an tihchhiat te hi kum 2018 January atanga kumin August thla chhunga an man a nih thu a sawi a, hemi chhung hian Anti-Tobacco Squad leh Food and Drug Administration te hian Joint Operation tum 5 an neih thu leh tun tuma an tihchhiat te hi Sikhar pocket 651, SS/S-19 (Tobacco) pocket 1961, Rajnigandha pocket 600 leh Tulsi pocket 70, a vaiin Pocket 3282 a ni tih a sawi a, cheng sing nga man dawn hu a ni. Heng Tobacco products tichhiat turte hi hal ral a remchan loh avangin Tui-a leih in tihchhiat a ni.