Mizoram-ah COVID-19 hri kai 14 hmuh belh an ni

Darkar 24 kalta chhungin Mizoram-ah COVID-19 hri kai mi 14 hmuh belh leh niin Mizoram-a hri kai hmuhchhuah chu 1428 an tling tawh.

Sawrkar thuchhuah tarlan danin darkar 24 kalta chhunga Mizoram-ah hri kai hmuhchhuah thar te hi ZMC Laboratory atangin mi 11 bakah TrueNat Laboratory atangin mi 2 leh Rapid Antigen Test hmangin mi pakhat te an ni a. ZMC Laboratory-a hri kai hmuhchhuah zinga mi 8 te hi Aizawl khawpui chhung Veng 5-a hri kai nen lo inkawmhnaih tawh atanga hri kai an ni a, midang 3 te hi State pawn atanga rawn haw leh Quarantine Centre-a awm lai an ni thung. Niminpiah a TrueNat Laboratory a hri kai hmuhchhuah 2 te hi Saitual District mi niin State pawn atanga rawn haw leh khunghran lai an ni a, Rapid Antigen Test hmang hri kai hmuhchhuah hi State pawn mi niin Bairabi a hmuhchhuah a ni bawk.

Heti hian nimin thleng khan Mizoram-ah COVID-19 hri kai hmuhchhuah chu mi 1428 an tling tawh a, an zinga mi 919 te chu enkawl dam ni tawhin tunah hian hri kai enkawllai 509 an la awm mek bawk a ni.

Mizoram District hrang hrang zingah Aizawl District chu hri kai hmuhchhuah tamna ber ni mekin Aizawl District-ah hian hri kai 944 hmuh an ni tawh a, Kolasib District-ah mi 207 hmuh ni tawhin Lunglei District-ah 128 hmuh an ni tawh bawk a. Hri kai hmuhchhuah la tlemna ber Hnahthial District-ah hri kai 2 hmuh ni tawhin Khawzawl District-ah hri kai 3 hmuh an ni tawh bawk a, Khawzawl District-ah hian June 20, 2020 hnuah hri kai hmuhchhuah awm tawh lovin hri kai hmuhchhuah loh reina ber District a ni bawk.

India-ah COVID-19 hri kai nuai 48 an tling tawh :

India ramah COVID-19 hri kai 92,068 hmuh leh niin India ram a hri kai hmuhchhuah chuan nuai 48 a tling ta. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 9,78,500 enfiah leh niin heng atang hian hri kai 92,068 hmuh leh an ni a, heng te nen hian India ramah sample 5,72,39,428 enfiah niin hri kai hmuhchhuah chu 48,46,424 an tling tawh a, India rama mihring vbc. 135 vel atanga chhutin sample enfiah erawh zaa 4.24 vel chiah ala ni a, sample enfiah zinga zaa 8.46 te chuan hri an kai tawh thung a ni.

Hetihlai hian darkar 24 kalta chhung khan India ramah hri kai 77,512 te chu enkawl dam niin India rama hri kai enkawl dam zawng zawng chu 37,80,107 an tling thung a, hei hi hri kai hmuh zawng zawng atanga chhutin zaa 77.99 niin tunah hian hri kai enkawllai 9,86,595 an la awm mek bawk a, hei hi hri kai hmuhchhuah atangin zaa 20.36 a ni bawk. India rama COVID-19 hri kai hmuhchhuah zingah hian nunna chan 79,722 zet an awm tawh bawk a ni.

Comments

Chhiar Hlawhte