Lirthei tlan dan tur enfiah

Serchhip-IV Village Council hmalakna in nimin khan Serchhip Bazar NH. 54-a lirthei te mumal zawka a tlan theih dan tur enfiah a ni.

Serchhip-IV Village Council te hian Serchhip Bazar lunlai, NH. 54-a lirthei inpelh dan leh tlan dan chu tun aia mumal zawka siam tha tiin ruahmanna engemaw zat an siam a, an ruahmanna siam zingah hian tuna Serchhip Bazar-a Traffic Point awmsa pakhat chu a awmna hmun sawnin Serchhip Bazar tual zau lai-ah dahin tuna Traffic Point leh a bula Hawkers thenkhat te chu sawn tura ruahmanin kawngpui hi ti zau hlek tura ruahman a ni bawk a. Heng an ruahmanna te hi Police thuneitute hnena an thlen hnuah nimin khan Addl. SP, PC. Laltanpuia hova enfiah niin harsatna awm thei leh he ruahmanna a that zawkna turte thlirho a ni a. Tun dinhmunah chuan thuthlukna mumal tak la siamin lovin a enchhinna hun chawlh-kar khat vel neih leh nise, chumi hnuah a thatna leh thatlohna te sawiho lehin ruahmanna hi la ngaihtuah chhunzawm leh nise an ti a ni.