Lengpui Airport-ah kangthelhna bungraw thar entir a ni

Airport Authority of India (AAI) in Leng-pui Airport-a kangthelhna hmanrua a pek thar te chu nimin khan thuthar thehdarhtute hmaah phochhuakin a hnathawh dan tur entir chhin a ni.

AAI-in Lengpui Airport-a hman tur kangthelh Motor a dah thar hi pathum (3) niin Austrian Company, Rosenbauer siam niin, 'Rosenbauer Panther' tih an ni a. Cheng vbc. 4.3 man pakhat leh cheng vbc. 3.5 man pahnih te niin tunlai thiamna hrang hranga thuam, tui leh kangthelhna atana hman 'foam' te pawh Joystick anga a thunun-na siam hmanga kahchhuah leh her tir theih vek a ni.

AAI hotute sawi danin, Thlawhna tum-hmuna Thlawhna chesualah kangmei chhuak a awmin Pilot ten rang takin Air Traffic Control Room an hriattir anga, anni hian Airport Fire Service-te che chhuak turin an hrilh ve leh nghal ang. Fire Service Team hi hrilh an nih atanga minute 2-3 chhungin chetsual hmun hi thleng hman ngei ngei tura ngaih an ni a, anmahni thutna tur theuha chechhuak hmanlo leh thu ve hmanlo an awm chuan 'thubuai awrh theihna khawp pawi-khawihna' a tling tih an sawi.

Tuna kangthelhna Motor thar hi Seconds 34 chhungin darkar khat-a KM 80-a chakin a tlan hman a, minute khat-ah Tui emaw, Foam emaw a phuhchhuah hi litres 2750 a tling a, tui litres 10,000 a pai thei a. A phuh thui theih zawng hi metre 90 tih a ni chungin meter 100 a phuh phak nia sawi a ni bawk a. AAI hotute chuan kang-thelh motor leh a hmanrua ah chuan hmarchhak Airport zingah Lengpui Airport chu a nei tha ber zing ami a ni tih an sawi bawk.

Nimin-a he hun hmanna ah hian Kang-thelh motor bakah Thlawhna chesuala chuangte chhanchhuah dan pawh entir chhin a ni a, Fire Service Team bakah Medical Team leh Security Team te tih tur leh chet dan tur entir a ni.