Mizoram-ah hri kai 1691 hmuhchhuah an ni tawh

Darkar 24 kalta chhungin Mizoram-ah COVID-19 hri kai 107 zet hmuhchhuah leh an ni a, heti hian Mizoram-a hri kai hmuhchhuah tawh zawng zawng chu 1691 an tling tawh.

Sawrkar thuchhuah tarlan danin niminpiah khan ZMC Laboratory atangin hri kai 106 hmuh belh niin heng zinga a tam ber te chu Aizawl khawpui chhung Veng hrang hrang ami te an ni a, Aizawl pawnlam ah Sawleng, Darlawn leh Thingsulthliah ami te pawh an tel a ni. Heti hian nimin thleng khan Mizoram-a COVID-19 hri kai hmuhchhuah chu 1691 an tling tawh a, mi 1023 te chu enkawl dam ni tawhin hri kai enkawllai 668 an la awm mek a ni.

Ni khat-ah hri kai nuai khat chuang enkawl dam an ni :

Darkar 24 kalta chhung khan India ramah hri kai 1,01,468 enkawl dam niin ni khat-a hri kai nuai chuang enkawl dam an nih vawikhatna a ni. Ministry of Health & Family Welfare chhin-chhiahna atanga a lan danin darkar 24 kalta chhung khan India ramah hian hri kai 1,01,468 enkawl dam niin hei hi India rama nikhat-a hri kai enkawl dam an tam ber tum leh nikhat-a nuai chuang enkawl dam an nih vawikhatna a ni a. Heng te nen hian India rama hri kai enkawl dam zawng zawng chu 44,97,867 tling tawhin India rama hri kai hmuhchhuah zawng zawng, 55,62,663 atangin zaa 80.85 te chu enkawl dam an ni tawh a ni.

India ramah hian darkar 24 kalta chhung khan sample 9,33,185 enfiah leh niin hri kai 75,083 hmuh leh an ni a, heng te nen hian India ramah Sample 6,53,25,779 enfiah ni tawhin hri kai hmuh zawng zawng chu 55,62,663 an tling tawh a, darkar 24 kalta chhungin nunna chan 1,053 awm leh bawkin hri kai zinga nunna chan zawng zawng chu 88,935 an tling tawh a ni.