Chanchin thar thenkhat :

 Assembly Session tan dawn

Mizoram Legislative Assembly 8-na thut-khawm vawi 6-na chu Vawiin atang hian neih a ni dawn a, ni 3 chhung a awh ang. India Danpui in a phut angin Mizoram Legislative Assembly thutkhawm hi neih a ni dawn a, he thutkhawm hi Hripui leng kara neih tur a nih avangin nimin khan Mizoram Legislative Assembly-a Member mi 35, Chief Minister Zoramthanga, Speaker Lalrinliana Sailo leh Minister dangte te tiamin, Assembly Secretariat-ah Rapid Antigen Test (RAT) hmangin COVID-19 an vei leh vei loh endik an ni a, an vaiin an negative vek a, hemi hmalam hian MLA dang 5 te chu test an lo ni tawh bawk a, anni pawh an negative vek a ni.


Hri kai 3 hmuh belh leh

Niminpiah khan Mizoram-ah COVID-19 hri kai mi 3 hmuh belh leh an ni a, heng mite hi Rapid Antigen Test hmanga hri kai hmuhchhuah te an ni. Mizoram sawrkar thuchhuah tarlan danin niminpiah a hri kai hmuhchhuah mi pathum te hi Kolasib District-a Rapid Antigen Test hmanga hmuhchhuah niin Mizoram pawn ami lirthei khalhtu mipa vek, kum 22 leh 42 inkar, Assam atanga lo lut niin COVID-19 symptoms neilo an ni. Niminpiah vek khan ZMC Laboratory-ah Sample 294 enfiah niin hri kai hmuhchhuah erawh an awmlo thung. Heti hian nimin thleng khan Mizoram-ah COVID-19 hri kai hmuhchhuah chu 1011 tling tawhin mipa 834 leh hmeichhia 177 an ni a, mi 589 te chu enkawl dam ni tawhin tunah hian hri kai enkawllai 422 an la awm mek bawk a ni.


CCC Building buaipui mek

Lunglei Chief Medical Officer (CMO) thar, Dr. Lalthlamuana chuan nimin khan a Office-ah thuthar thehdarhtute kawmin Lunglei District-ah COVID-19 hri kai mi 56 enkawlna chauh an la neih thu a sawi a, mi 100 enkawl theihna tur CCC Building thar sa tura hmalak mek a nih thu leh HPC Lunglei kaltlangin estimate thehluh thuai tum a nih thu a sawi bawk.


RT-PCR khawl hman duh

Lunglei Thalai Pawl chuan nimin khan Lung-lei DC, V. Lalsangliana chu hmuin Mizoram mipui vantlang zingah COVID-19 a darh chho mek nia a lan tawh avangin a rang thei ang ber leh a tam thei ang ber Sample endik chu tih makmawh a ni tih an sawi a. Lunglei-a Sample enfiahna khawl an hman mek chuan a zawh dawn loh avangin Politics a inbeihna dah bova, chhim lam mipui mamawhna hriaa, RT-PCR khawl chu hman thuai a nih theih nana hma la tura sawrkar an beisei thu an sawi.


CM Relief Fund atangin pe

Chief Minister’s Relief Fund for COVID-19 atangin tunhnai khan Mizoram House hrang hranga COVID-19 avanga tangkhangte chaw ei man ba pek tlak na turin Rs. 6,52,519/- pek-chhuah leh a ni a, heng te hi Guwahati Mizoram House a mi 23 tan Rs. 19,440/- leh mi 8 tan Rs. 26,980/-; Kolkata Mizoram House-a mi 76 tan Rs. 3,19,200/-; Delhi Mizoram House-a mi 68 tan Rs. 2,78,799/- leh Shillong Mizo-ram House-a mi 6 tan Rs. 8100/- te a ni.

Comments

Chhiar Hlawhte