Bazar-a dawr te kal dan Police leh VLTF ten enfiah

Serchhip Police te leh Serchhip-IV VLTF te chuan nimin khan Serchhip Bazar-a Dawr hrang hrang tlawhin Dawr neitu ten anmahni dawrtute an chhinchhiah dan an enfiah.

Mizoram sawrkar in hripui leng mek avanga tun thla ni 1-a mipuite kaihhruaina a siam-ah Dawr leh sum-dawnna hmun ah te ‘Dawrtu te Hming, Address, Contact Number leh an dawr hun chhinchhiahna record fel takin a vawng tur a ni,’ tih a nih angin Serchhip Police leh Serchhip-IV VLTF te chuan nimin khan Serchhip Bazar-a sumdawnna dawr hrang hrangte tlawhin Dawr neitu ten anmahni dawrtute hming leh an biakpawh theihna tur an chhinchhiah te an enfiah a, he hunah hian dawr tam zawkte chuan anmahni dawrtute hming, Address leh Contact number te an chhinchhiah laiin Dawr engemaw zat chuan an ziaklo thung.

Heng dawr te hi anmahni dawrtute chhin-chhiahna fel taka siam tura hriattir niin hun remchang ah enfiah an nih leh dawn thu leh hetah hian ruahmanna zawm lo te chungah Dan anga action lak a nih dawn thu hrilh an ni a, dawr thenkhat chuan hming ziakna tur hi lei nghalin hming hi an ziak nghal bawk a ni. Hetihlai hian inkaihhruaina in a tarlan, ‘Dawrtu te tan Hand Sanitizer an chhawp ngei ngei tur a ni,’ tih pawh zawmlo an tam viau a. ‘Dawr chhungah dawrtute luhtir loh tur a ni,’ tih pawhin zawm a hlawh lutuk lo bawk a ni.