Latest News

VC inthlanna neih tur atana inbuatsaihna a tha tih Serchhip District Observer in a sawi

Tun thla ni 27-a Village Council inthlanpui neih tura Serchhip District tana Observer tura ruat, Robert C. Lalhmangaiha MCS chuan he inthlanpui neih tur atana Serchhip District inbuatsaihna chu tha a tih thu sawiin, inthlanna muanawm leh felfai tak neih a nih theih nana thawhpui ah mipuite chu a sawm.

Nimin chawhnu-a Serchhip DC Meeting Hall-a thuthar thehdarhtute, Political Party hrang hrang leh NGO Coordination Committee bakah MPF hruaitute a kawmna ah he thu hi sawiin Robert C. Lalhmangaiha chuan Serchhip District chu hun rei tak alo awm tawhna a nih thu leh tun tum inthlanna a Observer tura ruat a nih thu sawiin, ram inrelbawlna lungphum pawimawh, Village Level-a sawrkarna siam tura kan inpuahchahna ah Serchhip District a thawktute chu mit an tlung hle a a hriat thu a sawi a, he inthlanna neih tura Serchhip District Election Office inbuatsaihna chu a tha viaua a hriat thu sawiin, nimin lamah Hrangturzo bial chhunga Polling Station hrang hrangte an tlawh tawh thu a sawi a, heng hmunah pawh hian Village Level Officer (VLO) leh Returning Officer te inbuatsaihna te pawh a tha hle nia a hriat thu a sawi a, karleh lamah Tuikum bial tlawh leh an tum thu pawh sawiin, inthlan dawn kar-ah Serchhip bial Polling Station hrang hrangte an tlawh leh dawn thu a sawi bawk.

He huna tel Political Party, NGO Coordination Committee, MPF leh thuthar thehdarhtute chu he inthlan lo awm turah hian inthlanna felfai leh thianghlim tak a awm theih nan thawhpui sawmin, hei hi he thutkhawm an koh chhan ber pawh a nih thu a sawi a. COVID-19 hripui laka kan him theihna tura sawrkar ruahmanna te zawm that a tul thu pawh sawiin, inhlat tawka awm (Social Distancing) te, hmaituamna vuahte, Kut sil uar te a pawimawh reng thu sawiin, inthlanna hmunah pawh Election Commission ruahmanna in Sanitizer chhawp vek tum a nih thu a tarlang a ni.

He hunah hian Serchhip Election Officer, Vanlalhmachhuana pawhin he huna tel te zawhna chhangin inthlanpui neih turah hian District Magistrate in mi 5 aia tam punkhawm khapna a siam chu kenkawh mek a nih thu te, Vote thlak turin mi 50 aia tam punkhawm phal a nih loh thu te, Vote thlak tur tan intlarna mumal tak siam vek a nih dawn thu te, Dan kengkawh turin Police te pawh an duty dawn thu te, Vote thlaktu mai bakah inthlan buaipuitute leh Vote thlaktute pawh taksa in tawk lo thei ang ber tura ruahmanna siam a nih dawn thu te sawiin, mipui ten rang zawka Vote an thlak theih nan Polling Station leh Voting Compartment pawh tam zawk buatsaih a nih thu a sawi a, mipui te pawhin Vote thlak hi hmanhmawh thei se a duh thu sawiin, Vote chhiar laiin mipui tan punkhawm phal a nih dawnloh thu a sawi a, inthlan result chu Tlangau hmang pawha puanzar tur a nih dawn thu a sawi bawk.

He hunah hian MPF Serchhip District Forum hruaitute pawhin inthlanna muanawm leh felfai a awm theihna tura hma an lakna leh rua-hmanna an lo siam tawh te sawiin, kumdang-a Vote thlak turte tana an Serial Number an lo sem thin te pawh sem leh tura ruahmanna an siam thu an sawi a, MPF leh Political Party ten thawhhona thuthlung an lo siam tawh anga hma an lak tur thu an sawi bawk.

He hunah hian tun thlengin he inthlan buatsaihna kawngah hian harsatna an la tawklo tih thawktute chuan sawiin, MCC bawhchhiatna chungchang ah pawh engmah dawn an la neih loh thu leh mipuite nen an thawhhona zarah inthlanna muanawm leh felfai neih theih ngei an inbeisei thu an sawi bawk.

VC inthlanna neih tur chungchangah hian Serchhip District Election Observer hnenah har-satna leh rawtna thlen duhte tan Phone Number 9485114964 leh 9862648914 bakah a Liason Officer, Raltawnkima Kawlni phone Number 9862552510-ah te engtiklai pawha biak theih an nih thu a sawi bawk.

Comments

Popular News (Last 30 Days)