Serchhip District-ah VC inthlanna neiin Party mal-ah MNF Party in VC an la tam fal hle

Mizoram District 9-a Local Council leh Village Council inthlanpui nei tura State Election Commission in ruahmanna a siam angin nimin khan Serchhip District-a VC 54-ah pawh inthlanna hi neih a ni a. He inthlanna a Vote tla te hi nizan khan chhiar nghal niin rorellai MNF chuan VC 54 zinga VC 34-ah hnehna an chang a ni.

Mizoram State Election Commission in ruahmanna a lo siam tawh avangin nimin khan Serchhip District chhung Village Council 54-a inthlanna chu boruak muanawm tak hnuaiah neih a ni a, tun tuma inthlanna ah hian Vote thlakna khawl hmang lova Ballot Paper hman a nih avangin nimin zing dar 7:00-a Vote thlak hun hawn a nih rualin VC Area hrang hrangah tluang taka Vote thlak tan theih vek a ni.

Kumin a Village Council inthlanna hi hri leng kara neih a nih avangin hri laka Vote thlaktute an him theih nan ruahmanna hrang hrang siam niin Vote thlak tur hian mi 50 aia tam punkhawm khap niin Veng hrang hrangte chuan an huamchhunga Vote nei ten a inchhawka Vote an thlak theih nan ruahmanna an siam a, Vote thlak tura intlar turte pawh inkarhlat taka din tir niin Polling Station luhna ah Kut silfaina chhawp vek a ni a, Vote thlaktute leh a buaipuitute pawh intawk lo thei ang ber tura ruahmanna siamin Vote thlak zo apiang ten an chhuah pah-a kut an silna tur ruahman vek a ni bawk a, hetianga ruahmanna siam a nih avang hian Vote thlak pawh hmun thenkhat ah chuan a chakloh phah deuh nia thudawn a ni a. Serchhip-a Election Office hotute chuan hmun tam takah a tira ruahman sa bak Vote thlakna hmun, Voting Compartment siam belh a nih thu an sawi a, tluang takin Vote thlak hi zawhfel a ni. He inthlanna ah hian Serchhip District puma Vote nei mi 47,070 zingah mi 37,920 ten Vote thlakin Vote tla zawng zawng hi  80.56% a ni a, Vote nei mipa 18,529 leh Hmeichhia 19,391 ten Vote hi an thlak a ni.

He inthlanna a Vote tla te hi nizan vek khan chhiar chhunzawm nghal niin nizan zanlai pelh hnu hret khan result kimchang pawh hriat nghal a ni a, rorellai MNF Party chuan VC 54-a in-thlanna neih ah VC 34-ah Party mal-a sawrkar siam thei turin hnehna an chang a, hnehna an channa khua te hi Baktawng Vengpui, Bawktlang, Buangpui, Chekawn, Chhuanthar Tlangnuam, Serchhip Darnam, East Lungdar, Hualtu, Kanghmun South, Keitum, Khawbel, Khaw-lailung, Leng, Lungchhuan, Lungkawlh, Ngen-tiang, New Serchhip North, New Serchhip South, North Vanlaiphai, Piler, Serchhip-I, Serchhip-III, Serchhip-IV, Serchhip-V, Sialsir, Thentlang, Thenzawl East, Thenzawl Kanan, Thenzawl West, Thenzawl Vengthar, Thinglian, Zote South, Serchhip Chanmari leh Vanchengte Village Council te an ni.

Indian National Congress (INC) chuan VC 9-ah Party mal-a sawrkar siam thei turin hnehna an chang bawk a, hnehna an channa te hi Hmawngkawn, Hmuntha, Lungpho, Neih-loh, Rullam, Serchhip-VI leh Serchhip-VII Village Council te a ni.

ZPM pawhin VC 6-ah sawrkar siam thei khawpa hnehna changin hnehna an channa te hi Chhingchhip, Hmunzawl, Mualcheng, Sai-lulak, Serchhip-II leh Sialhau VC te a ni a, Party chak bik awmlohna VC 7 awmin chung te chu Bungtlang, Hriangtlang, Khumtung, Mualpui Chhing-chhip, Serchhip-VIII, Chhiahtlang South, Chhiahtlang North VC te a ni.

VC la tam ber MNF Party hian Seat 240 awmah Seat 127 lain General Seat 94 leh Reserved Seat 33 a ni a, INC chuan dawtin General Seat 39 leh Reserved Seat 20 lain a vaiin Seat 59 an la a, ZPM chu General Seat 41 leh Reserved Seat 7 lain a vaiin Seat 48 an la bawk. Serchhip District-ah hian Independent-a ding ten General Seat 4 leh Reserved Seat 1, a vaiin Seat 5 an la a, BJP chuan Reserved Seat pakhat an la ve bawk a ni.

Comments

Chhiar Hlawhte