Chanchin thar thenkhat :

 Enkawlna tum sak dawn

COVID-19 dona kawnga thawktu zinga CO-VID-19 hri kaite inenkawlna senso zawng zawng sawrkarin a tum sak dawn tih sawrkar thuchhuah chuan a tarlang. Hemi chungchanga Health & Family Welfare Department thuchhuah chuan COVID-19 dona kawnga thahnemngai taka thawktute chungah lawmthu sawiin, an ngaihthah dawn lo tih an tarlang a. COVID-19 laka Mizoram kan him theih nana theihtawp chhuahtu Frontline Workers te, Volunteers te leh Task Force member te zinga COVID-19 hri kai palh te chu an inenkawlna senso zawng zawng tum sak turin sawrkarin thutlukna a siam fel tawh tih tarlangin, a kalphung tur ruahmanna peihfel tep a nih thu leh reilote ah notification pawh tihchhuah a nih tur thu an tarlang a ni. Health Department chuan COVID-19 dona kawnga thawktute chu tumah thlaphang lo tura ngenin, damdawi In te pawh an inenkawlna senso lo thing lo turin an hrilh bawk.


Hnathawktu tur inpe zel

Darlawn PHC-a thawk Staff Nurse pali (4) te zinga mi pahnih te chuan tunhnaiah hri leng avanga an hna an zawm theihloh avang leh midang pakhat chu In lama inkhunghrang tura tih a nih avanga thawktu indaihlohna phuhrukna atan Darlawn CCC-a thawk turin Doctor pakhat leh PHC thawk turin Nurse leh Laboratory Technician pahnih te an inpe a. Heng mite hian Vawiin hian an hna an zawm dawn a ni. Darlawn CCC a thawk tura inpe hi Dr. PC. Vanlalhlui, Darlawn khua leh tuna Aizawl Bawngkawn-a khawsa mek niin Staff Nurse inpe te hi Hmangaihlalremruati, Bethlehem Vengthlang leh Lalbiakkimi, Kepran te niin Lab Tech. inpe hi K. Lalchawimawia, Ratu leh Caroline Lalnunpuii, Darlawn te an ni.


Inthlanlohna tur puan belh

Nizan hmasa khan Mizoram State Election Commission chuan AMC huamchhunga Khatla South, Mission Vengthlang leh Lawipu Local Council-ah te chuan inthlanna neih rihlo tura puangin nimin khan inthlanna hi neih a ni ta lo.


Lirnghing in Mizoram a sawi

Nimin tlai dar 5:38 khan Lirnghing Magnitude 5.8  vela na in Mizoram sawi lehin he lirnghing hi Serchhip leh Champhai District-a khaw then-khat te chuan an hria a ni. He lirnghing avang hian Serchhip District chhung Leng khuaa UPC (NEI) Biak In chu a building thenkhat a chhia a, hei bak hi mihring tawrhna a awm hriat a ni lo. Lirnghing hi Champhai atanga chhimlam boruak-a KM 34 vela hlaa intan nia tarlan a ni.


Ramri hawng tan dawn

Disaster Management & Rehabilitation Department chuan thuchhuah siamin August 31, 2020 atangin Mizoram leh State thenawm inrina Bairabi, Kanhmun leh Vairengte te chu Thawhtanni, Ningani leh Inrinni-ah zing dar 6:00 atanga chhun dar 12:00 thleng khualzin phur lirthei kaltlang theih tura hawn a ni tawh dawn a, Lengpui Airport pawh khualzin phur Thlawhna te tan hawn a ni bawk ang.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn