Party 3 ten VC/LC inthlan hun sawn duh

Mizoram Pradesh Congress Committee (MPCC), BJP le MPC Party te chuan Mizoram-a Village Council leh Local Council inthlanna neih tur chu sawn an duh thu an sawi.

MPCC hruaitute hian nimin khan Aizawl Press Club-ah thuthar thehdarhtute kawmin Mizoram State Election Commission-in August 27, 2020-a Village Council leh Local Council inthlan buatsaih a tum chungchangah Congress party chuan chak ngei tumin theihtawp a chhuah mek tih sawiin, amaherawhchu, Mizoram mipui, vote thlak turte himna leh hriselna an ngaihpawimawh zawk avangin Village Council leh Local Council inthlan hun tur chu ngaihtuah nawn nise an duh thu an sawi a, COVID-19 hrileng dinhmun ngaihtuah chungin inthlan hun hi sawn rih mai nise tih chu an party duh dan a ni tih an sawi.

BJP Mizoram Pradesh President, Vanlalhmuaka pawhin nimin khan Aizawl-ah thuthar thehdarhtute kawmin hri leng mek dinhmun thlirin Village Council leh Local Council General Election nei tura inbuatsaih chu tha an tihloh thu a sawi a. COVID-19 hripui kai hlauhna avangin mipuite pawh vote thlak tura an chhuah hreh mai kan hlauh rualin, kan khawtlang hriselna a tihderthawn zual phah ang tih hi kan hlau hle a ni, a ti bawk.

MPC Party pawhin nimin khan thuchhuah siamin tunhnaiah COVID-19 hrileng kaithar an pun zel avangin Aizawl khawpui chhung Veng hrang hrangah Total Lockdown kalpui a ngai leh ta chu pawi an tih thu an tarlang a, hetianga hripui avanga mipuite mangang leh ralkhela kan tawmim lai a nih avang hian August 27-a Local Council inthlan hun atana ruahmanna awm sa chu sawn leh turin Mizoram sawrkar an ngen a, Village Council inthlanna neih tur pawh kan hun tawngin a zir zia ang zela ngaihtuahna seng thar ngam turin sawrkar chu an ngen bawk.