India ramah Mizoram a titha ber niin tarlang

MNF Party chuan thuchhuah siamin North East-a chanchinbu lar tling pha, The Shillong Times August ni 6 chhuakah COVID-19 do kawngah India ram puma titha ber chu Mizoram a nih thu tarlan a ni tih an sawi.

Nimin-a thuchhuah an siamah MNF party chuan he thu hi tarlangin, hei hi Union Ministry of Health & Family Welfare tarlan dan an chhuah chhawn a ni nghe nghe tih an tarlang a, COVID-19 do kawnga Mizo mipuite kan tanrualna azara Mizoram in chawimawi leh fak kan hlawh chu lawmawm an tih thu an tarlang. Hemi chungchangah hian Health Minister, Dr. R. Lalthangliana chuan, “COVID-19 do kawnga hetianga fak kan hlawh ve chhan hi Sawrkar, NGO leh Kohhran kan vaia kan tanrualna rah liau liau a ni a, a lawmawm takzet a ni. Kawng engkimah sawiselbo chu kan ni hauh lo a, mahse kan theihtawp chhuahna Pathian in mal a sawm a, a lawmawm tak zet a ni,” a ti bawk.