COVID-19 chungchanga hmalak zel dan tur rel

Niminpiah tlai khan Health & Family Welfare Minister, Dr. R. Lalthangliana hovin tunhnaia COVID-19 vei an pun tak thut avangin Emergency Meeting chu SAD Conference Hall-ah neih a ni.

He thutkhawm ah hian Mizoram University hnuaia Under Graduate leh Post Graduate exam tur te chu exam nei hrih lo (postpone) turin Disaster Management & Rehabilitation Department atanga thurawn (advisory) pek ni se tiin nitin mamawh phurtu truck drivers bakah rampawn atanga thlawhna a lo lut nitin mi (passengers) 60 atanga 70 leh lirthei-a Vairengte paltlang (by road)-a lo lut mi (passengers) 50 an awm tih ngaihthlak a ni a, Mizoram-ah COVID-19 positive a pun tak hluai avangin nitin a lo lut te (entry of passengers) hi awmze neia khuahkhirh tulin an hria a, a tul anga hmalak ni se tih a ni a. Rapid Antigen Test Kit singkhat lei belh tur a hmalak ni se tih remtih a nih bakah Vairengte-ah Doctor leh Lab. Technician paruk dah belh nghal tura rel a ni bawk.

Hei bakah hian Zoram Medical College, Falkawn hi COVID-19 veite enkawlna tur bika ruahman a nih angin, COVID-19 vei nilo chu damlo dang tumah admit tawhloh tura rel a ni a. Khawtuala inkaidarh lo awm palh ta se, hemi atana inbuatsaihna, a bikin a hmatawng-a thawkte (frontline workers) tan hmalak dan tur ruahmanna (Contingency plan) neih ni se tiin Swab Sample result nghak tan inkaihhruaina (SOP) siam ni se tih remtih a ni bawk. Heng bakah hian Mitthi vuina programme-a mipui kalkhawm zingah contact tracing tih ngai awm ta se, harsatna a awm theih dawn avangin, chhiatni thatni inkaihhruaina chungchangah YMA hruaitute leh Kohhran hruaitute nen inrawn tlan that leh ni se tih a ni a. Gymnasium leh Sports Complex te khar leh tura hmalak ni se tih remtih a ni bawk.

He hunah hian I&PR Minister, Lalruatkima chuan Cabinet Meeting-in a lo rel tawh anga Minister pahnih Lalchhandama Ralte leh TJ. Lalnuntluanga te nen tunhnaia Kolasib District an tlawh chungchang a sawi a. Tun dinhmunah nitin mamawh (esstential commodities) a bikin buhfai dinhmun a tha tih a sawiin, Vairengte Screening Point a hmalakna chak leh zuala kalpui a nih theihnan ruahmanna an siampui tih a sawi a. COVID-19 hripui leng chungchangah kan hmabak sawithiam har hle mah se sawrkarin theihtawp chhuahin hma a la a, mipui te pawh sawrkar hmalakna ring ngam a chi-ai lo tur leh mahni awmna hmun theuhah fimkhur turin a chah a ni.

Chief Secretary Lalnunmawia Chuaungo pawhin Independence Day, 2020 lawmna-ah National Anthem, Guard of Honour lak leh Chief Minister thuchah a awm dawn tih a sawi a, tunlai boruak avanga kan him nan kumdang anglo in mipui leh zirlai sawm an ni lo tih a sawi bawk.

Comments

Chhiar Hlawhte