Ni 2 chhungin Serchhip District-ah hri kai 59 chhuahtir

Serchhip District chhunga COVID-19 hri kai enkawl zinga mi 59 te chu Inrinni leh nimin khan chhuahtir niin Serchhip District-ah hri kai enkawllai 27 an la awm mek.

Serchhip CMO Office atanga thu kan dawn danin Serchhip Tarpi Tlang SIRD DCHC-a COVID-19 hri kai enkawl mi pathum te chu enkawl dam an nih hnuah nimin khan anmahni enkawlna hmun atang hian chhuahtir an ni a, heng mite hi Serchhip khua vek niin Assam Regiment Sipai an ni a, tun thla tir lama Serchhip-a rawn haw an ni.

Hemi hma Inrinni khan Serchhip Nursing School CCC atangin BSF Sipai mi 38 te chu chhuahtir an ni a, heng BSF Sipai te hi ICMR Guidelines atanga hri an kai tih hmuh-chhuah atanga ni 14 a liam hnuah pawh anmahni ah natna hri kai lanchhuahna a awm loh avangin dam-ah ngaih an ni a, hei vang hian anmahni Battalion-ah theuh ni 7 inkhunghrang leh tura tih niin chhuahtir an ni. Serchhip Nursing School CCC-ah hian a tirah mi 40 rawn dah niin Ser-chhip-a lo awm sa te dahluh an nih bakah a hnua an rawn dah leh te nen mi 50 an awm a, mi 38 chhuahtir an nih hnu hian midang 12 chu enkawl zui an la ni dawn thung a ni.

Inrinni vek khan Thenzawl AYUSH Hospital CCC-a hri kai enkawl BSF Sipai mi 18 te pawh dam-a chhuahtir an ni a, helai hmun-ah hian Inrinni khan mi 7 rawn dah leh thungin Thenzawl CCC-ah hian mi 10 enkawl mek an ni bawk. Heti hian Tarpi Tlang-a SIRD DCHC-ah hri kai enkawllai mi 5 la awmin Nursing School CCC-ah mi 12 leh Thenzawl AYUSH Hospital CCC-ah mi 10, an vaiin mi 27 enkawl lai an la awm a ni.