National Remote Sensing Day 2020 lawm a ni

National Remote Sensing Day 2020 lawmna chu nimin khan Directorate of Science & Technology Conference Hall, Aizawl-ah neih a ni.

'Father of Indian Space Programme' ti hriat, Dr. Vikram A. Sarabai pianchamphaphak denchhena 'National Remote Sensing Day' hman thin puala inkhawm Mizoram Remote Sensing Application Centre (MIRSAC) buatsaih neih ah hian Chief Scientific Officer leh MIRSAC-a Member Secretary Dr. R.K. Lallianthanga chuan India ramin Vansang lam thiamna kawnga tun dinhmun a thlen theihna chhan chu Dr. Vikram A. Sarabai hmalakna rah a nih thu sawiin, India ram chu khawvel huap pawhin vansang thiamna lamah hmun pawimawh taka a din tawh thu a sawi a. Mizoram-ah pawhin hetiang lama thiamna a hman tangkai theih turin MIRSAC kaltlangin theihtawp chhuahin hma a la mek a ni, a ti a. MIRSAC hi North East India State Remote Sensing Centre zingah thawk tha ber pawl a nih thu thu sawiin, MIRSAC Scientist-te leh thawktu dangte chu ram leh hnam tana thahnem ngai taka thawk sauh sauh turin a fuih bawk.

National Remote Sensing Day hi ISRO Centre hrang hrangin kumtin August 12-a lawm thin a ni a, nimin-a he hun hmanna ah hian MIRSAC in Mizo tawng-a an lehkhabu buatsaih ‘Remote Sensing & GIS’ chu tlangzarh niin he lehkhabu hi Ram hruaitu pawimawh te, Department hrang hrang leh Research Scholar ten Remote Sensing leh GIS an lo hriatchian lehzual theihna tura ziak a ni.