Mizoram District 9-ah VC 556 awmin Vote nei 4,55,597 an awm

Mizoram District 9-ah Village Council 556 awm mekin Vote nei thei 4,55,597 an awm mek a, Lunglei District-ah Vote nei thei hi an tam ber a ni.

State Election Commission thupek angin Mizoram-a District 9 (pakua) - Aizawl, Lunglei, Serchhip, Champhai, Mamit, Kolasib, Saitual, Khawzawl leh Hnahthial District chhunga Village Council Electoral Rolls buatsaih chu zawhfel a nih hnuah Mizoram State Election Commission chuan District hrang hrangte dinhmun hi a tarlang a, heng District 9-ah hian Village Councils 556 awmin Vote nei thei mi 4,55,597 an awm a, heng zinga mi 2,25,068 chu mipa niin midang 2,30,529 chu hmeichhia an ni. Kum 2015 Village Council inthlana vote nei thei (mi 3,96,610) aiin mi 58,987 in an pun belh a, District 9 (pakua)-a voter punna belhkhawm hi 14.87% a ni.

District hrang hrang zingah Electors tamna ber chu Lunglei District niin kumin Village Council inthlana vote thlak thei tur mi 87,460 an awm a; vote nei thei tlemna ber chu Hnahthial District niin mi 21,427 vote nei an awm a ni. District 9 (pakua) chhunga Village Council zinga Electors tamna ber chu Lunglei District chhunga Chan-mari VC niin vote nei mi 3,220 an awm a, Lunglei District-a Thehlep VC chu Electors tlemna ber Village Council ni thungin mi 31 in Vote an nei bawk a ni.