Mizoram-a COVID-19 avanga nunna chan la awm lo Pathian min humhimna vang a ni tih sawi

School Education Minister leh Tuivawl bialtu MLA, Lalchhan-dama Ralte chuan Mizoram-ah COVID-19 avanga nunna chan kan la awm lo chu Pathian min humhimna vang a ni, a ti.

Tuivawl bialtu MLA, Lalchhamdama Ralte hian tunhnaia a bial chhung khaw thenkhat ah COVID-19 hri kai hmuhchhuah an awm avang leh mipui harsatna leh thlaphanna te a hmun ngeia zirchiang turin niminpiah khan Tuivawl bial chhung khaw thenkhat tlawhin a kal a. Kepran, Sawleng leh Darlawn-a khawtlang leh Kohhran hruaitu leh Village Level Task Force-te nen khawtlang-a hripui darhzel tur ven dan tur leh inbuatsaihna hrang hrangte thlirin sawihona an nei a ni.

Tuivawl bialtu MLA chuan khawvel-a hripui leng chuan a bial chhunga khaw thenkhat a rawn luhchhuah ve ta tih sawiin, “Ka bial mipuite in mangang tih ka hria a, mihring lama thil thalo thleng thei hrang hrangte hre reng chungin engpawh tawh huamin ka bial mipuite kianga awm turin ka rawn kal a ni,” a ti a. Mizoram sawrkar pawhin Tuivawl bial mipuite tan a tih theihtawk a chhuahzel dawn tih sawiin, mipuite pawh sawrkarin kan himna tura inkaihhruaina hrang hrang a siamte chu thuawih taka lo zawmzel turin a ngen bawk.

Tuivawl bialtu MLA leh School Education Minister ni bawk Lalchhandama Ralte chuan, khawvel-a hrileng Corona Virus-in khawvel pumah mihring nunna tam tak a suat tawh chung pawhin Mizoram-ah COVID-19 avanga nunna chan an la awm ve lo chu Pathian min humhimna vang a ni tih a sawi a. “Kohhran leh tlawmngai pawl, Zoram mipui leh sawrkarin lungrual taka he hripui hi kan do chuan kan hneh hun a la awm ngei ang,” a ti bawk.

Comments

Chhiar Hlawhte