Mizoram-ah COVID-19 kai 12 hmuh belh leh an ni

Pathianni khan Mizoram-ah COVID-19 hri kai mi 12 hmuh belh leh niin Mizoram-a hri kai hmuhchhuah chu 789 an tling tawh a, mi 371 te chu enkawl dam an ni tawh thung.

Mizoram sawrkar thuchhuah tarlan danin Pathianni-a COVID-19 hri kai hmuhchhuah te hi ZMC Laboratory atangin mi 7 leh Rapid Antigen Test hmangin mi 5 te an ni a, ZMC Laboratory atanga hri kai hmuhchhuah thar te hi Aizawl District mi 6 leh Lawngtlai District mi pakhat te niin naupang kum 10 leh 11 mi te bakah puitling te an ni a, an zing ami 6 te hi hri kai tawh te nen an lo inkawmhnaih avanga hri kai niin Chaltlang Lily Veng mi 3 leh Sawleng mi 2 leh Darlawn khaw mi pakhat te an ni a. Hri kai hmuhchhuah pakhat, Lawngtlai District mi hi State pawn atanga rawn kal hnamdang a ni thung.

Rapid Antigen Test hmanga hri kai hmuhchhuah mi 5 zingah hian Serchhip District mi pahnih an tel thung a, heng mite hi Assam atanga rawn haw sipai te niin midang pathum te hi State pawnlam mi niin State pawn atanga lirthei rawn khalh lut, Kolasib District-a Test te an ni thung.

Heti hian nimin thleng khan Mizoram-ah COVID-19 hri kai hmuhchhuah chu mi mi 789 tling tawhin heng te hi mipa 656 leh hmeichhia 133 te an ni a, an zinga mi 372 te chu enkawl dam ni tawhin tunah hian hri kai enkawllai 417 an la awm mek a, hri kai zinga mi 2 te chu State pawn lamah enkawl tura thawnchhuah an ni tawh a ni.


India-ah COVID-19 hri kai nuai 26 tling tawh :

India rama COVID-19 hri kai hmuhchhuah chu nuai 26 an chuang ta a, Sample enfiah zawng zawng atanga zaa 8.81 te chuan hri hi an kai a ni. Ministry of Health & Family Welfare chhinchhiah danin darkar 24 kalta chhung khan India ramah Sample 7,31,697 enfiah leh niin heng te nen hian Sample 3,00,41,400 enfiah niin heng atang hian hri kai 26,47,663 hmuhchhuah an ni tawh a, Sample enfiah atanga hri kai hmuhchhuah hi zaa 8.81 an tling tawh a ni. Tunah hian hri kai zinga mi 19,19,842 te chu enkawl dam ni tawhin hri kai zinga zaa 72.51 te chu enkawl dam an ni tawh a, tunah hian hri kai enkawllai 6,76,900 an la awm mek bawk a, hri kai enkawl dam hi an pung chho zel a ni.

Hetihlai hian darkar 24 kalta chhung khan India rama hri kai zingah nunna chan 941 zet an awm ve leh bawk a, heng te nen hian India rama hri kai nunna chan hi 50,921 an tling ve ta bawk a ni. India ramah hian State leh UT 35-ah COVID-19 hri kai hmuh an ni tawh a, heng zingah hian Mizoram tihloh State leh UT dang-ah chuan hri kai zingah nunna chan awmin Mizoram chauh hi hri kai hmuhna zinga nunna chan la awmlohna a ni.

Khawvel-ah COVID-19 kai vbc. 21 tling tawh :

Khawvel pumah Coronavirus kai mi 21,853,483 an awm tawh a, United States chu hri vei tam berna ram a la ni chhunzawm zel. Khawvel puma COVID-19 kai tam berna ram United States-ah hian hri vei mek 2,471,697 an awm mek a, mi 1,73,139 in an thihpui tawh bawk a ni. Brazil chu hri vei tam ber dawttu niin hri vei mek mi 799,862 awmin, 107,879 in an thihpui tawh a. India chu hri vei tamna ram pathumna ni mekin 6,76,900 in an vei mek a, mi 50,921 in an thihpui tawh bawk a ni. Tun dinhmunah khawvela COVID-19 kai enkawl dam zat chu 14,576,694 niin hri vei dam tawh zat hi zaa 66.7 a ni bawk.

Comments

Chhiar Hlawhte