Chanchin thar thenkhat :

Video Conference-ah thlen

Nimin khan Union Minister of Environment, Forest & Climate Change (EF&CC), Prakash Javadekar-a kaihhruaina hnuaiah State hrang hrang EF&CC Minister te Video Conference neih a ni a, he hunah hian Nagar Van Scheme, School Nursery Scheme, Plantation under 20 Points Programme, Afforestation in Catchments of 13 Rivers, LiDAR Survey for Soil moisture Conservation leh National Transit Permit Portal chungchang te sawiho a ni a. He hunah hian Mizoram atanga tel Forest Minister, TJ. Lalnuntluanga chuan Scheme hrang hrang hnuaia Mizoram sawrkar hmalakna te sawiin, State mamawh te a thlen nghal bawk.


Inthlan inbuatsaihna hrilh

Kolasib District Bawrhsap, Dr. H. Lalthlang-liana chuan Village Council inthlanpui neih tura hmalak dan leh ruahmanna kal mek inhrilhhriatna hun nimin khan a Pisa-ah buatsaihin Political Party te an tel a, he hunah hian Bawrhsap chuan Kolasib District chhungah VC Constituency 56-ah inthlanna neih a nih tur thu leh hemi atan hian Polling Booth 92 buatsaih a nih thu a sawi a. Returning Officer leh Village Level Officer-te training pek vek an ni tawh tih sawiin, Presiding Officer-te tan training pawh Vawiin-ah buatsaih a nih tur thu te a sawi bawk. Hei bakah hian Sector Magistrate ten Election Material pekchhuah zawng zawng an vilpui tur thu leh Village Council inthlanna chu sum hmanralna tlem thei tur ang ber a kalpui tum a nih thu a sawi bawk.


NDD Week hmang leh dawn

Nimin khan Lunglei leh Mamit-ah tun thla ni 24 leh 28 chhunga Rulhut hlo pekna ni Hapta, National Deworming Day (NDD) Week 2020 hman dan tur chungchang ngaihtuah a ni a, he Hapta ah hian naupang kum 1 atanga kum 19-te hnena Rulhut hlo hi pek tura ruahman niin kumin hian hripui leng avangin ASHA leh Anganwadi Worker ten anmahni bial theuh ah In tina kal chilhin Rulhut hlo hi pe tura ruahman a ni.


Sample 27,115 enfiah tawh

Mizoram pumah nimin tlai dar 5:00 thleng khan mi 27,115 te Sample enfiah angin COVID-19 hri kai mi 789 hmuhchhuah an ni tawh. Mizoram atanga Sample enfiah tawh zinga 22,191 te chu ZMC Laboratory atanga enfiah niin hri kai 596 hmuh a ni a, Rapid Antigen Test hmanga Sample enfiah 3431 atangin hri kai 131 hmuh a ni tawh bawk. Hei bakah hian Lunglei Civil Hospital Truenat khawl-ah Sample 1435 enfiah tawh atangin hri kai mi 61 hmuh an ni tawh bawk a, Guwahati Medical College-ah Sample 12 enfiahin hri kai pakhat hmuh a ni laiin NICED-Kolkata a Sample 5 en-ah hri kai hmuh an awmlo thung.

Comments

Chhiar Hlawhte