Mipui nitin mamawh chungchangah Meeting neiin Thil man a to uchuak loh nan hmalak rel a ni

COVID-19 hri leng avanga Inter-State Border-a lirthei lut tur khuahkhirh avanga mipui nitin mamawh bungrua (Essential Commodities) harsatna awm thei te ngaihtuahin Inrinni khan sawrkar mi pawimawh te an thukhawm a, thil man to uchuak-a zawrh a awmloh nan thil man khuahkhirh lamah theihtawpa hmalak rel a ni.

FCS&CA Director, Dr. Lalhriatzuali Ralte hova FCS&CA Conference Hall, Aizawl-a he thutkhawm ah hian Essential Commodities hrang hrang dinhmun ngaihthlak niin, buhfai chungchangah ZIDCO report atangin tun dinhmunah mipui tan harsatna awm rihlo tura ngaih a ni a. Supply Godown lamah OMP buhfai a thathnem deuh avangin unload na tur a awm rihlo a, hei avang hian buhfai hi an la phur rih lova. Eirawngbawlna Gas (LPG) chu Bottling Plant atanga LPG load phur Truck 70 chu an Agency la thleng lo la awmin Mizoram Indane Gas Distributors' Association (MIDA) chuan tun dinhmuna an bungraw neih sa pawhin chawlhkar hnih vel chu mipui mamawh a la phuhru thei tho tura an ngaih thu an sawi bawk.

He Meeting hian COVID-19 avanga thil man uchuak taka lo chhiar an awm loh nan a tam thei ang bera mipui leh dawrkai te hnenah fimkhur tura inhrilhhriat a, mipuiin dawrkai zinga diklo taka thil man lo chhiar to uchuak an hriat chuan Legal Metreology hnenah report zel turin an rel a. Essential items phurtu (driver) te chu kawng laka thil lei mai mai a him loh avangin anmahni tla tur Ration pai tura hrilh hriat nawn ni se an ti a. Driver/handleman zinga COVID-19 positive hmuhchhuah, enkawlna hmuna dahluh tawhte chu an lirthei leh bungraw kalsan chungchangah IOC lamin Transporter te be pawpin a tul angin hma la tura ruahmanna siamin, District thuneitute leh DM&R Department lamah kal zel dan tur thlen ni se an ti a. Essential Items 26 bakah Chini, Packaged Water, Spices (hmuihmer), Purun var, Damlote ei tur bik Food Supplements, Bakery leh Confectionery Items te Essential Items-ah chu telh belh nise tiin rel a ni bawk.

Vairengte a Truck rawn khalhtute leh puibawmtute chu sawrkar ruahmanna anga COVID-19 test tih sak an nih hnuah hri kai an lo awm palh chuan a thlaktu tur IOC hnuaia transporter ten an ngaihtuah tura ngaih a ni a. Thlaktu tur an lo awm remchanglo palh a nih pawhin Mizo driver zingah Explosive License nei pawh an awm theih tur thu he Meeting-ah hian tarlan a ni. IOC lam pawhin an Depot-a load la tura kal te chu COVID Test neih tir zel tura hmalak a nih theih nan leh load lakna hmunah hian inchiahpiah lo a, him zawka kalpui a nih theih ruahmanna siamin sawrkar ah thlen rel a ni bawk.

Comments

Chhiar Hlawhte