Chanchin thar thenkhat :

 Kawng siam mek enfiah

Mizoram sawrkar-a Road and Infrastructure Development Board Vice Chairman, Er. H. Lalzirliana chuan nimin khan Sairang leh Khamrang inkar NH-54 leh Thingdawl leh Kolasib inkara kawng chhe zual lai siam hna thawh mek chu a enfiah a, helai kawng enkawltu NHIDCL hnuaia Contractor, JR Construction Company hotuten lo dawngsawngin, an hnathawh dan leh harsatna an neih te an lo hrilh a ni. Road & Infrastructure Development Board Chairman, Chief Minister hova Meeting-in Mizoram hmun hrang hranga kawngpui dinhmunte endik vek tura thu an lo dah tawh angin, Board member te hi Team hnih-ah inthenin Team pakhat hian Hmar tlangdung leh khawthlang lam an fang mek a. Ruahman ang chuan karleh lamah chhimlam leh khawchhak lam fan chhunzawm a ni ang.

MCAB hmalakna thlirho

Mizoram Cooperative Apex Bank Ltd. Board of Directors Meeting nimin-a neih ah kumin April atanga June thla inkar chhungin MCAB-ah cheng nuai 9282 dahluh anih thu tarlan a ni a. He thutkhawm ah hian bank dinhmun hrang hrang thlirho niin COVID-19 hri leng karah pawh April - June, 2020 chhungin sum Deposit cheng nuai 9282 in a pung tih an sawi a, Lockdown karah pawh mimal, pawl leh kohhran hrang hrang hnenah loan pekchhuah reng a nih thu leh CD Ratio pawh zaa 60 chung lam a nih thu tarlan a ni bawk. He thutkhawm ah hian Loan dilna lut te ngaihtuah niin mimal Loan leh Kohhran Loan dilna 26 atan cheng nuai 346 an sanction a ni. 

Khumbeu hmang turin ti

ZPM Party Election Department chuan Local Council Rules, 2015 Section 46 (6) in a sawi angin Registered Party, Recognised Party ni silo te tan Free Symbol pek atangin eng Symbol pawh hman phalsak a nih thu sawiin, Local Council leh Village Council inthlanah ZPM hminga an Official Candidate turte zawng zawngin Symbol atan Khumbeu hman theuh tur a nih thu an sawi.

NSUI in Award an hlan

National Students' Union of India (NSUI), Mizoram chuan tunhnaia HSLC leh HSSLC Result chhuaka Topper te hnenah nimin khan 'Dr. Lal Thanhawla Award' an hlan. NSUI (Mz) President, RB. Lalmalsawma kaihhruai Award hlanna inkhawm Aizawl Congress Bhavan Golden Hall-a neih ah hian Zirlaite hi chawi-mawina thuziak (Citation) pek an nih bakah Mizoram Rural Bank (MRB)-ah Account hawn sak vek an ni a, an Account-ah hian Rs. 20,000/- theuh dahsak nghal an ni bawk. Award dawng-tute hi HSLC-a Topper mi 2 leh HSSLC-a topper mi 4 te an ni.

Police ten mi bumtu man

Mizoram Police te chuan dan lova mi Bank Account lei khawma LIC Agent anga inchhal mi pahnih, hmeichhia kum 32 mi, Kolasib College Veng leh mipa kum 21 mi, Lunglei Zotlang nia inchhal te chu an man a. Anni pahnih hian mi Bank Account leikhawmin an leikhawmte hi hnamdang hnenah hlep neiin an hralh chhawng leh thin tih hriat a ni. Heng mite hnen atang hian Bank hrang hrang Pass Book-40; ATM Card -10 ; Cheque book-13; Mobile SIM Card hrang hrang-22 leh pawisafai Rs. 24,000/- chu an man tel bawk a ni.