Chanchin thar thenkhat :

 Vairengte-ah mihring en dawn

Kolasib District Bawrhsap, Dr. H. Lal-thlangliana chuan Cabinet Meeting thutlukna bawhzuiin Vairengte checkgate paltlang-a lirthei lo lut khalhtute leh mihring an phurh zawng zawng chu Rapid Antigen Test hmanga endik vek an nih tawh tur thu nimin-a Vairengte checkgate a Screening Point siam thar a tlawhna ah a sawi a, he hunah hian Bawrhsap chuan Vairengte-a Medical Team te COVID-19 laka kan ram a him theih nana thawktu pawimawh tak an nih angin, an hna chu rinawm tak leh theihtawp chhuah chunga fimkhur taka thawk turin a chah bawk. Ruahman lawk ang chuan Bairabi leh Saiphai lamah bungrua leh passenger phur lirthei kaltlang phal a ni dawn lova, Vairengte atanga rawn lut tur reng reng chuan Rapid Antigen Test nei hmasa in Negative te chiah an rawn lut thei dawn a ni.


Hri kai 620 tling tawh

Nimin thleng khan Mizoram-ah COVID-19 hri kai hmuhchhuah 620 tling tawhin mi 323 te chu enkawl dam an ni tawh. Sawrkar thuchhuah tarlan danin nimin thlenga Mizoram-a COVID-19 hri kai hmuhchhuah 620 zinga 503 te chu mipa niin midang 117 te chu hmeichhia an ni a, hri kai zinga 323 te chu enkawl dam ni tawhin tunah hian hri kai enkawllai 297 an la awm mek a, hri kai atanga chhutin enkawl dam hi zaa 52.09 an ni. Mizoram-a hri kai enkawl mek zinga 206 zet te chu Aizawl District-a enkawl an ni bawk.


FPO kalpui dan tur sawiho

Nimin khan Mamit-ah District Level Monitoring Committee for Central Sector Scheme (CSS) chu an Chairman leh District Bawrhsap, Dr. Lalrozama IAS hova thukhawmin Mamit District-a kuthnathawktu intelkhawm, Farmers Producer Organisation (FPO) te hlawk zawk leh mumal zawka an kal theihnana hmalakna tur an sawiho a. FPO pakhat-ah hian member 100 tal awm ngaiin kum 3 chhung atan cheng nuai 18 ruahman a ni a, Mamit District-ah chuan Mizo Chilli ching tura hmalak tum a ni bawk.


Free Symbol hman ngai

PRISM Party chuan Election Symbol atana an hman, Lunghlu (Diamond) chu Election Commission of India in an la reserved sak loh avang leh Free Symbol zingah Lunghlu a tel tawh si loh avangin VC/LC inthlanah hian Lunghlu hi hman theih a ni dawnlo tih an sawi a. Hei vang hian an Party atanga inthlanna chuh turte chu Free Symbol-a mahni duh thlang turin an hriattir bawk.


India-ah hri kai nuai 22 tling

India ramah COVID-19 hri kai mi nuai 22 chuang hmuhchhuah ni tawhin hri kai hmuhchhuah atanga zaa 69.33 te chu enkawl dam an ni tawh. Ministry of Health & Family Welfare chhin-chhiahna atanga a lan danin darkar 24 kalta chhung khan India ramah Sample 4,77,023 enfiah leh niin heng atang hian hri kai 61,973 zet hmuh-chhuah leh an ni a, heti hian India rama sample enfiah 2,45,83,558 atangin hri kai 22,15,074 hmuhchhuah niin Sample enfiah atanga zaa 9.01 te chuan hri an kai ta a ni.

India rama hri kai hmuhchhuah zawng zawng atang hian 15,35,743 te chu enkawl dam ni tawhin hei hi hri kai hmuhchhuah atanga zaa 69.33 a ni tawh a, tunah hian hri kai enkawllai 6,34,945 an la awm mek bawk a, hri kai enkawl-lai aiin enkawl dam hi 9,00,798 in an tam zawk a ni. Darkar 24 kalta chhung khan India rama hri kai hmuhchhuah zinga 1007 te chuan nunna chan lehin tun thlengin India ramah hri kai nunna chan 44,386 an awm tawh bawk a ni.


Khawvel pumah COVID-19 vangin mi nuai 7 chuang thi

Khawvel pumah COVID-19 hri kai zingah nunna chan mi 7,34,181 an awm tawh. Johns Hopkins University-in a tarlan danin, Khawvel ah COVID-19 hri kai mi 200,36,472 an awm tawh a, hri kai zinga mi nuai 129,07,529 chu enkawl dam ni tawhin tun dinhmunah hri kai mek mi 63,94,762 an awm a, chung zinga 65,000 dawn chu dinhmun ngaihtuahawm an ni a, hri kai zingah nunna chan 7,34,181 an awm tawh a ni.

Khawvel ram hrang hrang zingah USA chu hri kai hmuhchhuah tam bera ni mekin hri kai 50,45,645 hmuh an ni tawh a, USA bawk hi nunna chan tam berna niin 162,938 an thi tawh a, Brazil-ah hri kai 30,35,422 hmuh ni tawhin hri kai hmuhchhuah tam lamah pahnihna a ni a, mi 101,049 thiin thi tam lamah USA an dawt a ni.

Comments

Chhiar Hlawhte