Hri kai 42 enkawl mek a ni

Serchhip District-ah COVID-19 hri kai enkawl-lai 42 awm mekin sawrkar hmunhmaa inkhung-hrang mi 49 an awm mek bawk.

Serchhip CMO Office atanga thu kan dawn danin Serchhip District pawn lama COVID-19 hri kai thenkhat te Serchhip District chhunga rawn dah an awm avangin Serchhip District-a hri kai enkawl hi an pung ve zel a, nimin thleng khan Serchhip Tarpi tlang-a Dedicated COVID Health Centre (DCHC)-ah mi 11 enkawl mek niin Thenzawl AYUSH Hospital-a COVID Care Centre (CCC)-ah mi 31 enkawl mek ni bawkin Serchhip District-a hri kai enkawllai hi 42 an awm mek a ni. 

Hetihlai hian Serchhip District chhunga sawrkar hmunhmaa inkhunghranna (Quarantine Facility Centre)-ah mi 49 khunghran mek an la ni a, Tourist Lodge Serchhip-ah mi 17, P&E Rest House, Bukpui-ah mi 2, Sainik School, Chhing-chhip-ah mi 17, Tourist Lodge Thenzawl-ah mi 11 leh Highway Restaurant, Chhiahtlang-ah mi 2 te an ni. Nimin khan Serchhip atangin Swab Sample 11 te chu enfiah turin ZMC-ah thawn a ni a, nizan khan result pawh hriat nghal beisei niin niminpiah-a Serchhip atanga Swab Sample thawn 11 leh Rapid Antigen Test hmanga Sample 4 enfiah te chu hri lakah an fihlim vek a ni.