COVID-19 vanga nunna chan kan awmloh nan theihtawp kan chhuah reng dawn - Health Minister

Health Minister Dr. R. Lalthangliana chuan COVID-19 hri leng dona kawnga kan tanrualna rah kan hmu zel tih sawiin, he kan thawhrim tlanna rah hi sawrkar laipui hotute pawhin an rawn hmuthiam zel tih a sawi a. “COVID-19 vanga nunna chan kan awmloh nan theihtawp kan chhuah reng dawn a ni,” a ti bawk.

Mizoram COVID-19 dinhmun thlirho hun Inrinni chawhnu-a Chief Secretary's Conference Hall, Aizawl-a neih ah he thu hi sawiin Health Minister, Dr. R. Lalthangliana chuan Aizawl tih loh District 10-ah Truelab Quattro Real Time Quantitative (Micro PCR) bun fel a nih tawh thu sawiin, a tam zawk hi chu tunkar tir lamah hman tan theih a nih a beiseiawm thu a sawi. Heng khawl te hian natna chi hrang hrang 16 a enfiah theih avangin thingtlang leh hmun hla deuh zawka damlo, Aizawl pan ngai thinte pawhin anmahni District Hqrs. ah an in enfiah thei tawh dawn tih sawiin, tangkai takin kan chhawr ngei a rin thu a sawi a. Khawl enkawltu tur pawh a hranpa a lak ngai lovin thawktu neih sa atanga pawh an nih thu leh training pek fel vek tawh an ni tih a sawi a. “Khawl pakhatin nikhat-ah Sample 100-200 a enfiah theih tawh dawn avangin kan tangkaipui hle dawn a ni,” a ti a. COVID-19 dona kawnga Tlawmngai pawl, khawtlang hruaitute, Kohhranho te, mipuite leh sawrkar hnathawkte zawng zawng kan zavaia kan tanrualna rah kan hmu zel tih sawiin, “He kan thawhrim tlanna rah hi sawrkar laipui hotute pawhin an rawn hmuthiam a, fak pawh kan hlawh em em a, COVID-19 vanga nunna chan kan awmloh nan theihtawp kan chhuah reng dawn a ni,” a ti a. COVID-19 dona kawnga thawktu indaihlohna phuhru turin hmalak zel a nih thu a sawi bawk.

He thutkhawm ah hian COVID-19 vei te enkawlna hmun tur, Covid Care Centre (CCC) leh Dedicated COVID Health Centre (DCHC) indaihlohna phuhru tura hmalak a nih thu sawilan a ni a, hmalam hun thlirin a tlem berah a ruala mi 2500 enkawl theihna tur CCC leh DCHC mamawh a nih thu tarlan niin CCC atana hman mek indaihlohna phuhru tura ruahmanna siam zingah khawtlang lamin rem an tih loh vanga hman rem-chang lehlo a awm thin avanga buaina an tawh thu te, District tinah CCC atana hman tura hual lawk sa a awm tawh thu leh heng te hi harsatna awm lova hman theih a nih vek chuan mi 2000 bawr vel enkawl theih a nih beisei thu sawi a ni.

DCHC atan hian Mizoram chhunga PHC leh CHC bakah District Hospital hrang hranga hmun thlan bikte ruahman a nih thu leh heng DC-HC-ah te hian damlo 400 vel enkawl theih beisei a nih thu tarlan a ni a. CCC leh DCHC in a daihlo a nih chuan loh theihloh a In lama inenkawl tura in haw tir a ngaih dawn thu sawilan a ni bawk.

He hunah hian hri kai hmuhchhuah an awma an sulhnu chhuitu pawl, Contact Tracing Team hotute pawhin an hmalakna te tarlangin, Local Task Force te nen an thawhhona a that avanga hnuchhui a awlsam thu an sawi a. Contact tracing tihna ah harsatna lian zawk a thlen loh nan hri kai hmuhchhuah te leh an lo kawm hnaih ten engmah zep neilo thin se an duh thu an sawi bawk.

He hunah hian Sample Collection Team te hmalakna pawh ngaihthlak niin Sample lak hun tur chungchangah Local Task Force leh Contact Tracing Team nen ruahmanna siamho a nih thin thu an sawi a. COVID-19 veite CCC atanga chhuahtir dan tur chungchang sawilan niin ICMR in inkaihhruaina dan a siam thar ber zulzuiin Mizoram-a hman tur inkaihhruaina dan siam vat tum a nih thu tarlan a ni bawk.

He hunah hian Health Minister chuan Task Group on Documentation in COVID-19 dona kawnga hmalakna zawng zawng uluk takin an lakhawm tih pawh sawiin, report an siam dawn thu leh hei hi thangthar lo la awm zel turte tan pawh tangkai tak a la nih ngei a rin thu a sawi bawk.

Comments

Chhiar Hlawhte