Congress Party in MNF Party chu mipui himna aia Party hamthatna ngai pawimawh ah an puh

Mizoram Pradesh Congress Committee (MPCC) chuan MNF sawrkar chuan mipui himna aiin an Party hamthatna tur an ngai pawimawh zawk niin an sawi.

Nimin a thuchhuah an siamah MPCC Media Department chuan Village Council leh Local Council inthlanna neih tur chu Opposition Party hrang hrang ten COVID-19 hrileng avanga sawn tura an ngenna in ngaih pawimawh a hlawh lo nia sawiin, August 27, 2020-a inthlanna neih tura ruahmanna lo awm tawh chu kaltlangpui a ni dawnin a lang ta tih an sawi a. Aizawl khawpui ah phei chuan Total Lockdown puan mek a nih thu sawiin, party dangte Campaign-na remchang siamsak an tum lo tih a chiang hle niin an sawi.

MPCC chuan COVID-19 hri darh mek hlauhna avangin vote tla in hun dang a pha dawn lo tih a chiang hle nia tarlangin, hetianga campaign hleihtheih loha kan awm a, vote tla a tlem hian rorellai party tan tlinna remchang tha tak a nih theih avangin inthlan hi kaltlangpui luih an tum ta nia a lan thu an tarlang a. “MNF sawrkar hian mipui himna ai chuan an party hamthatna tur an ngai pawimawh ber a ni tih a chiang hle a ni,” tiin, “Hetiang a nih avang hian Village Council leh Local Council inthlan lo awm turah hian vote thlak tur zawng zawngten mipui himnana aia an party hamthatna dah hmasatu MNF sawrkar thil tih dan kan duh loh zia lantir nan an candidate-te vote lo turin kan ngen a. Hetihrual hian, hrileng laka inveng fimkhur tak chunga thahnemngai taka vote thlak turin mipui kan ngen nghal bawk,” an ti.

Hei bakah hian MPCC chuan inthlan hmachhawn turin Congress Party chu a inpeih tih sawiin, “Hmun hrang hrangah candidate kan nei thain, Congress party member-te tha thar nen an tho leh mek a ni,” an ti bawk.

Comments

Chhiar Hlawhte