Chanchin thar thenkhat :
Pathianni khan Mizoram-ah COVID-19 hri kai mi 14 hmuhchhuah an ni. Pathianni khan Lunglei Civil Hospital TrueNat khawl-ah Sample 28 enfiah niin heng atang hian hri kai mi 12 hmuh-chhuah an ni a, heng mite hi BSF Sipai vek niin Melte Camp-a awm an ni a, State pawn atanga rawn kir vek an ni. Pathianni vek khan Rapid Antigen Test hmangin Aizawl-ah hri kai mi 2 hmuhchhuah an ni bawk a, Bihar leh Delhi atanga lo kir niin Lawngtlai-ah nimin khan Silchar atanga rawn haw hri kai hmeichhe pakhat hmuh-chhuah a ni bawk. Nimin khan Mizoram-ah hri kai enkawl dam mi 8 awmin Mizoram-ah hian hri kai hmuhchhuah 483 tling tawhin mi 266 chu enkawl dam an ni a, mi 217 enkawl mek an ni.
Inthlanpui atan inbuatsaih
Nimin khan Aizawl DC leh District Election Officer ni bawk, R. Lalramnghaka hovin Local/Village Councils Election, 2020 lo awm tura inbuatsaihna chungchang-ah Nodal Officers leh Asst. Nodal Officers te an thukhawm a. Aizawl DC chuan State Election Commission-in Local/Village Election ni (date) la puang lo mah se, engtiklai pawha puan theih a nih avangin inpuah-chahna neih chhoh chu a tul thu a sawi bawk. Aizawl District-ah hian Local Council 83 awmin, Polling Station 83 leh Polling Booth 227 a awm a, Village Council 69 awmin Polling Station 69 leh Polling Booth 88 a awm dawn bawk a ni.
DC in leiminna hmun tlawh
Lawngtlai District Bawrhsap leh District Disaster Management Authority Chairman ni bawk, Dr. Andrew H. Vanlaldika chuan Inrinni kalta zan-a Lawngtlai Chanmari Veng-a leiminna hmun chu nimin khan a tlawh a, he leiminna hmun hi Lawngtlai atanga Mampui panna kawng an-a awm niin hian chhungkaw 4 te kawmthlang min in an Ek In a chhe vek a, Bawrhsap chuan Ek In siamsak dan ngaihtuah an nih tur thu a sawi. He leimin hi pialtlep chung niin In erawh a khawih chhe lo nia hriat a ni.
Volunteer te chawimawi
COVID-19 hri leng dona atana hlawh nei lova thawk tura Lunglei District-a inpe te chawi-mawina hun chu nimin khan Lunglei CMO, Dr. Thani Pachuau hovin neih a ni a. He hunah hian CMO chuan Covid-19 hrileng avanga Health Department in thawktu indaihloh lai taka hlawh nei lova Laboratory Technician, GNM, Driver leh a tul apiang thawk turin mi 20 leh Agriculture Minister, C. Lalrinsanga’n mi 7 a rawih sak bakah HPC Vice Chairman, Lawmawma Tochhawng in thla hnih chhung atana mi 2 leh Sumo 1 a tula hman atana a rawih sak avangin lawmthu a sawi a. CPVID-19 hrileng do nana Frontline worker-a an tel chu a hluin chhinchhiahna tha tak an siam thu a sawi a, nakin zela hna an zawnna ah pawh he chawimawina (Certificate) hi Work Experience tha tak leh tangkai tak ni turah a ngaih thu a sawi bawk.
PM hnenah ziakin thlen
Chief Minister, Zoramthanga chuan nimin khan Prime Minister, Narendra Modi hnenah lehkha thawnin Mizoram-a COVID-19 hrileng darh zau zel tur ven nan State leh State inkara Central Armed Police Force te veivak thin chu August thla chhung chu khap rih turin a ngen a. Chief Minister chuan tunhnaia Mizoram a COVID-19 vei case thar chu a tam zawk Para-military an nih thu leh tun dinhmuna active case kan neih zinga 75% chu Paramilitary niin, an zinga a tam zawk chu State pawn atanga tunhnaia lo lut an nih thu Prime Minister hi a hrilh bawk.
Translation Book Award hlan
Mizo Writers Association (MWA) chuan ‘Allah Aiah Isua’ tih lehkhabu chu kum 2019 chhunga Mizo tawng-a lehkhabu lehlin tha berah thlangin a letlingtu Lalrinzuala hnenah ‘Translation Book Award 2019’ an hlan a, he Award hian tangkafai Rs. 5,000/- leh thuziak a kengtel a ni. Hei bakah hian kumin HSSLC Exam-a Mizo Subject a Mark hmu sang ber, R. Lalnunhlimi, Synod HSS hnenah Lalmama Proficiency Prize leh Mizo Subject a Mark hmu sang ber Lalngaihsaka, Mount Carmel School hnenah Ch. Pasena Proficiency Prize te an hlan bawk a ni.
Comments
Post a Comment