Thil ruk ching nia hriat man

Tunhnaia Serchhip khawpui chhung Veng thenkhat-a mi In rawktu leh mi huan Thlam-ah te lut-a Sangha Dil te sawisatu nia hriat, Lalchawimawia (27), Serchhip Zozam Veng-a cheng nia insawi chu niminpiah khan Police ten manin a thil ruk nia hriat thenkhat te pawh hmuhlet leh a ni.

Serchhip Police te hnen atanga thu kan dawn danin tunhnai khan Serchhip-ah Mobile Phone bo report engemaw zat dawn niin Serchhip P&E Veng-a DRDA Office building hnuai ber-a Chowkidar Quarters pawh rawk niin pawisafai rukchhuah a ni bawk a. Hei bakah hian mi huan Thlam-a lut leh huan thlai sawisak chungchang bakah Thlam-a thil hlu dah bo report te pawh an dawng nual a. Heng thil-a mawhphurtu nia hriat Lalchawimawia hi niminpiah khan Serchhip District Police te chuan Thenzawl-ah manin Ser-chhip-ah rawn lakchhoh a ni ta a ni.

Lalchawimawia hian a hmalam pawhin thubuai hrang hrang lo nei tawhin Central Jail-a a tan hnuah kumin March thla tir lam khan COVID-19 hrileng avanga Supreme Court in Jail tang te chhuah then tura a tih ang khan rawn chhuahtir a ni tih Police te chuan an sawi a, hetianga Jail atanga a rawn chhuah hnu hian pawikhawihna a awm leh avangin amah hi hun engemaw chen atang khan an lo zawng tawh a, tunkar chho ah pawh zan thum lai tlaivara an chhui thu sawiin, niminpiah khan Thenzawl-ah a awm tih hriat a ni a, Thenzawl Police ten lo chhui zuiin an lo man ta a ni.

Lalchawimawia hnen atang hian pawi-safai Rs. 1900/- hmuhlet niin a thil ruk an chhuizuina ah Mobile Phone 7 leh Power Bank pakhat pawh an hmuhlet tawh thu Police te chuan an sawi a. Serchhip Police te chuan hetianga rukruk thubuai a tam em em chhan chu mi thil ruk lo leichhawng duh kan awm thin vang a ni tih sawiin, hetianga mi thil ruk lo lei hi IPC Section 411 hmanga hrem theih a nih avangin mipuite chu thil ruk a ni tih hriat theih, man tlawm lutuk te lei lo turin an chah bawk.