Surgeon dah vangin Health Minister lawmthu hrilh

Serchhip District NGO Coordination Committee chuan Serchip-a rawn kal Health Minister, Dr. Lalthangliana chu lo hmuin Serchhip-ah Surgeon dah a nih avanga lawmthu  an lo hrilh.

Inrinni-a Serchhip DC Pisa Tual-a Health Minister, Dr. R. Lalthangliana an lo hmuhna ah hian Serchhip District NGO Coordination Committee hruaitute chuan Serchhip District in hun rei tak chhung mi zai thiam bik, Surgeon nei lova a awm hnuah sawrkar laka lungawilohna lantir leh hotute lu ti hai zawnga nawrna emaw awm lova sawrkar a rinna an nghah tawp thu sawiin, an beisei ang leh rinna anga sawrkar in Serchhip District-a Surgeon a rawn dah thar te chu lawmawm an tih thu tawngka leh ziakin an lo hrilh a. Hei bakah hian hri leng dona kawnga a hmalakna chu chhuanawm an tih thu an sawi bawk a ni. He hunah hian NGO Coordination Committee-a tel YMA, MHIP leh MZP hruaitute telin Minister hi pangpar an hlan nghal bawk.