Serchhip-ah COVID-19 hri kai 2 hmuh belh an ni

Mipui tan chi-ai na tur a awmlo - CMO, Serchhip

Serchhip atanga niminpiah-a ZMC Laboratory-a Swab Sample thawn 53 chu niminpiah vek khan enfiah nghal niin COVID-19 hri kai mi 2 hmuhchhuah an ni a, heng te hi BSF Sipai, Dawngzawl-a Battalion Hqrs. a khunghran mek te an ni a. Serchhip CMO chuan mipuite tan chi-ai na tur a awmloh thu a sawi.

Sawrkar thuchhuah tarlan danin niminpiah khan ZMC Laboratory-ah hian Swab Sample 320 enfiah niin heng zingah hian hri kai hmuhchhuah pahnih awmin midang 318 te chu hri lakah an fihlim thung a, heng COVID-19 positive hmuh thar te hi mipa ve ve kum 31 leh kum 50 a upa, 60 Bn BSF mi leh sa, Dawngzawl Camp, Serchhip District ami te an ni. Hri kai hmuhchhuah zinga a upa zawk hi kum 51 a upa, BSF driver niin June 25, 2020-a Dolcherra atanga Vanhne Base Camp/Quarantine Centre lut niin, July 3, 2020 khan Vanhne atangin Dawngzawl-a an Camp-a haw, Symtom nei a ni a. Hri kai hmuhchhuah naupang zawk hi kum 31 a upa, June 25, 2020-a Dolcherra atanga Vanhne Base Camp/Quarantine Centre-a lut niin, July 3, 2020 khan Vanhne atang Dawngzawl Camp-a haw leh Symptoms a nei rihlo a ni.
Serchhip CMO Office-a thawktute chuan Dawngzawl-a BSF Camp-ah hian Barrack pakhat chu Quarantine Centre atana siam a nih thu sawiin, tuna hri kai hmuhchhuah te pawh hi he Quarantine Centre-a awm hi an nih thu an sawi a, Vanhne atanga Serchhip-a an hmunpui-a an rawn haw hnu hian helai hmunah hian dah an nih thu sawiin, tuna hri kai hmuhchhuah thar te hi Tarpi tlang SIRD hmun-a Dedicated COVID Health Centre (DCHC)-a enkawl an nih dawn thu an sawi bawk.
Serchhip Chief Medical Officer, Dr. Laldawngliana Sailo chuan Serchhip-a BSF Sipai zingah COVID-19 hri kai hmuhchhuah awm mah se mipui tan chi-ai na tur a awmlo tih a sawi a. Nimin-a kan Palai in a biakna ah Ser-chhip CMO, Dr. Laldawngliana Sailo chuan tun tuma Serchhip-a COVID-19 hri kai hmuh-chhuah, BSF Sipai te hi anmahni hmun ah tha taka khunghran an nih thu sawiin, amaherawh chu hetianga hri kai hmuhchhuah an awm tak avang hian Dawngzawl BSF hmun-a inkhung-hranna an kalpui dan chu va enfiah a nih dawn thu a sawi a. Tuna hri kai te bulhnaia lo awm chhui zui ngai pawh awmlo tura ngaih a nih thu a sawi bawk.
Tunhnaia Serchhip Vengchung vel-a BSF Sipai thenkhat ke-a kal leh dawr-a thil lei an awm nia sawi chungchanga zawhna chhangin Serchhip CMO chuan heng mite hi tunhnaia Ser-chhip-a rawn haw te ni lovin Serchhip-a awm sa, an sipai pui Serchhip-a rawn haw tur leh Eklavya Model Residential School-a Quarantine turte mamawh tur dah-a lo han kal an nih thu a sawi a, hei vang hian mipuite tan lo hlauh viau tur leh lo chi-ai na tur awm ah an ngailoh thu a sawi bawk.
Tuna hri kai hmuhchhuah mi 2 an awm leh tak avang hian Serchhip District atangin COVID-19 hri kai hmuhchhuah mi 5 an awm ta a, mi 3 te chu enkawl dam niin midang pahnih te hi enkawl mek an ni ta a ni.
Hetihlai hian nimin khan Serchhip District chhungah inkhunghrang thar mi 8 an awm leh a, heng mite nen hian tun thlenga Serchhip District-a inkhunghrang chu mi 144 niin sawrkar hmunhmaa inkhunghrang mi 65, In lama inkhung-hrang mi 77 leh Dedicated COVID Health Centre-a inkhunghrang mi 2 te an ni.
Sawrkar hmunhmaa inkhunghrang mek te hi Tourist Lodge, Serchhip-ah mi 11, Tourist Lodge, Chhiahtlang-ah mi 2, P&E Rest House, Bukpui-ah mi 4, Agriculture Rest House-ah mi 2, Eklavya Model Residential School-ah mi 29, Sainik School, Chhingchhip-ah mi 10 leh Tourist Lodge, Thenzawl-ah mi 7 te an ni.

Comments

Chhiar Hlawhte