Mizoram atangin Dragon Fruit Sample thawnchhuak

Mizoram tharchhuah Dragon Fruit chu Delhi-a zawrh turin nimin khan a sample te Cooperation Minister, C. Lalrinsanga kaihhruaina hnuaiah M/s MIZOFED Ltd. chuan an thawnchhuak.

Mizoram thar-chhuah Dragon Fruit sample thawnchhuah chungchangah hian Cooperation Minister, C. Lalrinsanga chuan Horticulture Department leh Cooperation Department hnuaiah State Level Society thangduang tak, MIZOFED Ltd. te chu an thawhhona a tha in hmasawnna hrang hrang an hmu zel tih a sawi a. COVID-19 hrileng karah harsatna hrang hrangin min tlakbuak chung pawha Dragon Fruit sample an thawnchhuak thei chan Market zau zawkah min dahchhuah tir dawn tih a sawi a. Hetianga hma kan sawn zel chuan kan Economic Perspective pawh Subsistence Level chauh ni lovin, Market Economy lam kawng kan zawh chho thei dawn tihna a ni, a ti. Cooperation Minister chuan SEDP-in a tum, Market thleng phak ruahmanna kalpui zel chu an duh ber leh kan mamawh ber a ni tih sawiin, “Mizote hian tanrual hi kan thiam zawng tak a ni a, Cooperative Movement hi kan thil zei sa a ni bawk a; tuna kan mamawh chu hmalam pana kal mai hi a ni a. Tanrual kan thiam a, thapui kan thawh phawt chuan Pathian hian a malsawmna hi hla taka a dahlo tih pawh kan hmu zel ang,” a ti bawk.

Nimin-a Dragon Fruit Sample thawnchhuah hi Thingsul Tlangnuam loneitute tharchhuah a ni a. Dragon Fruit hi Local Market-ah zawrh a ni tlangpui thin a. MIZOFED hian market zau zawk dapin tunah hian Mizo-ram pawna Dragon fruit te hi hralhchhuah turin Delhi lama M/s Crofarm, Gurgaon hnenah a thawn a. Ruahmanna ang chuan Dragon fruit hi regular zawka hunbi neia thawnchhuah chhunzawm zel a ni ang.