Mizoram-ah hri kai enkawl mi 29 chiah awm tawh

Mizoram-a COVID-19 hri kai hmuhchhuah zingah enkawl dam pung zelin nimin thleng khan hri kai enkawl mek mi 29 chiah awm tawhin mi 122 te chu enkawl damin damdawi In atanga chhuahtir an ni tawh.

Sawrkar thuchhuah in a tarlan danin nimin khan Mizoram District hrang hranga COVID-19 hri kai enkawl mi 61 te chu enkawl dam an nih hnu ah damdawi In atanga chhuahtir an ni a, heng mite hi Lunglei District-ah mipa 29 leh hmei-chhia 16, an vaiin mi 45 bakah State Referral Hospital, ZMC-a enkawl mi 8, Aizawl District mi 7 leh Kolasib District mi pakhat leh Mamit District-a enkawl mi 8 te an ni a, heti hian Mizoram-ah hri kai hmuhchhuah mi 151 atangin mi 122 te chuan damdawi In an chhuahsan ta a, tunah hian enkawl mek mi 29 chiah awm tawhin hri kai hmuhchhuah zawng zawng atangin zaa 80.79 te chu enkawl dam an ni tawh a, heng bakah hian hri kai tawhlo, damdawi In atanga chhuak mai thei tur te pawh an la awm bawk a, hri kai zingah nunna chan an awmlo bawk a ni.

Tun thlenga hri kai la awmna District te hi Mamit District-ah 11, Aizawl District-ah 7, Champhai District-ah 4, Lunglei, Serchhip leh Khawzawl District-ah 2 theuh leh Saiha District-ah pakhat te an ni.