Dawr, sumdawnna hmun leh eizawnna hmun dangte a pangngaia hawn theih a ni tawh dawn

Hri leng avanga Mizoram-a inkharkhipna kalpui mek chu Vawiin atang hian zangkhai zawka kalpui chhunzawm a ni dawn a, hemi atan hian nimin khan inkaihhruaina thar pawh tihchhuah niin Dawr, sumdawnna hmun leh eizawnna hmun dangte chu a pangngaia hawn theih a ni tawh ang.

Nimin khan sawrkar chuan thuchhuah siamin Vawiin atanga tun thla ni 31 thlenga zangkhai zawka inkharkhipna kalpui dan tur hi a tarlang a, heta tarlan a nih danin Inkharkhipna kalpui zel turah hian Mizoram luhchhuahna International Border leh Inter-State Border khar mekte chu khar chhunzawm a ni anga, Lengpui Airport erawh hawn chhunzawm tur niin thlawhna a Mizoram lo lut tur reng reng chuan mCOVID-19 mobile application-a mPASS-Flight-ah Mizoram pan-a an 1o chhuah hma-in an in register lawk tur a ni a. Bairabi, Vairengte leh Kanhmun kaltlang kawngpuite erawh chu Mizoram-a hman tur bungraw phurlut leh Mizoram-a thar leh siam bungrua phur chhuak lirtheite tan hawn a ni anga. Mizoram-a lo lut tur zin veivahna lirthei erawh chu Home Department phalna nei chauh kal phal niin Mizoram atanga chhuak tur zin veivahna lirthei erawh chu an awmna Deputy Commissioner te phalna la in an chhuak thei ang.
Mizoram pawn atanga lo lut tur reng reng chu Quarantine tur niin Quarantine dan tur fel taka ruahman a nih theih nan Mizoram Sawrkar phalna lak hmasak a ngai a, phalna nei-a rawn lut turte chu Entry Point-ah uluk taka Screening kalpui chhunzawm tur niin Mizoram chhunga Office zawng zawngte chu dan pangngaiin an kal anga, Office tinah SOP for Social Distancing khauh taka kalpui tur niin Minister te interview hun erawh khar rih ala ni ang.
Zan dar 7:30 leh zing dar 4:30 inkarah pawn chhuah khap tlat a ni dawn a, kum 65 chin chunglam te, taksa hriselna lama harsatna neisa te, naupai te leh naupang kum 10 hnuailam te chu mahni Inchhungah inkharkhip tur niin pawn lama chhuak tur reng reng chuan face mask emaw, hmanraw dang hmangin hmai an tuam ngei tur a ni a,  Vantlang hmun leh dawra kalte chu metre hnih tal-a inhlata awm tur a ni ang.
Mizoram chhung khaw kar kawnga passenger phur lirthei (Commercial Passenger Vehicle) leh City/Town Bus, Taxi, Auto Rickshaw leh Two Wheeler Taxi te chuan registration-a seating capacity tarlan aia tam an phurh phal a ni dawn lova, Zirna In leh Training Institute te chu khar chhunzawm zel a ni ang. Sakhaw biakna hmunah te chuan mipui punkhawmna tur inkhawm programme pangngai siam khap rih a ni anga,  Biak In-a zing tawngtai, inneih inkhawm leh lawmna (reception), mitthi vuina, lungphun, anniversary, politics leh pawl thila kalkhawmna chi reng rengah mi 50 aia tam punkhawm khap a ni a.  Games & Sports practice, Book Release leh hetiang lam chi reng rengah mi 25 aia tam punkhawmna huaihawt phal ni lovin Games & Sports Tournament huaihawt pawh phal a nilo bawk.
Dawr, sumdawnna hmun leh eizawnna hmun dangte chu a pangngaia hawn theih a ni tawh dawn a, Beauty parlour, lumehna leh Spa te chu hawn phal niin Social Distancing a awm theih nan Appointment siam lawk tur a ni a, hmanrua te pawh uluk taka tih thianghlim hmasak tur niin Hawkers Stall chungchangah DC kaihhruaiin Local Task Force ten ruahmanna an siam ang.
Public Park, Picnic Spot, Movie Theatre, Gym leh intawllenna hmun zawng zawng chu khar chhunzawm tur a ni a, Dawr zawng zawng (damdawi dawr tiam lovin) tlai dar 6:00-ah khar vek tur a ni bawk ang.
Heng inkaihhruaina zawmlo te chu Dan hmanga hrem theih niin a tul dan azirin inkaih-hruaina hi siamthat theih a ni bawk ang.

Comments

Chhiar Hlawhte