Gas buk tlinglo man leh a ni

Nimin-a Serchhip-a eirawngbawlna Gas rawn thleng chu enfiah a nih hnuah buk tlinglo a awm tih hmuhchhuah niin Gas semna hmuna buk a nih hnuah buk tlinglo tam tham tak manchhuah a ni.

He Truck MZ-01-G/4488 hian kar kalta Nilaini, July ni 8 khan Borkhola Bottling Plant-ah eirawngbawlna Gas hi zuk lain Serchhip a rawn panpui a, nimin zing khan Serchhip rawn thlengin enfiah a nih hnuah buk tlinglo a awm tih hmuh-chhuah a nih avangin nimin khan a semna tur hmun, Serchhip Hmar Veng-ah buk vek niin hetah hian buk tlinglo bur 132 hmuhchhuah a ni a, heng te hi a tlangpuiin Kg. 2 vel zela tlinglo niin Vawiin-ah hremna pek dan tur ngaihtuah a ni ang.

Tarlan tawh angin kar kalta Ningani khan Serchhip-a eirawngbawlna Gas sem tura rawn phurh chu enfiah a nih hnuah buk tlinglo bur 63 hmuhchhuah a lo ni tawh bawk a, heng te hi Legal Metrology Enforcement Staff te chuan manin lirthei khalhtu hi Rs. 4000/- an chawitir bakah Gas buk tlinglo te hi thawnkir a lo ni tawh bawk a ni.