Tualthattu nia hriat te man

Inrinni chawhma lam khan Malsawmkima, Serchhip Chanmari Vengthar chu mi Huan Thlam-ah thi-a hmuh a ni a, mi kuttuar-a thi nia hriat niin a thattu nia hriat mi pahnih (2) te pawh Inrinni zan khan man nghal an ni.

Kum 28-a upa Malsawm-kima s/o Rinhlua hi Inrinni dar 10:30 vel khan Serchhip DIET Mual mawng lam-a ramkal ten Thlam pakhat ah thi in an zuk hmu a, a ruang bulah hian midang pakhat lo awmin, ani hian he ruang a zuk hmuh hma hian midang pahnih te an lo awm thu leh heng mite hi zualko tura a tirh hnuah a hmun nghakah a lo tang tih a sawi a. He thil thleng hi Serchhip Police te hriattir nghal niin Police te hi a hmun ah kalin thil thlen dan an enfiah nghal a, Malsawmkima hian a taksa ah hliam nasa tak tuarin thisen pawh a hloh nasa hle a ni.

Serchhip Police te chuan he ruang zuk hmuhna a lo awm mi pakhat hi thu zawhfiah tura lain zualko tura a tirh te hi zawn nghal an ni a, Inrinni zan dar 8:30 vel khan Serchhip Chanmari Veng huamchhung, Moria tawngtaina hmuna an awmlai chu manin an pahnih hian Serchhip Police Station-ah lak nghal an ni a, Serchhip Police Station-ah tualthah thubuai siam sak niin Serchhip District Jail-ah dahluh nghal an ni.

Pawikhawihtu nia rinhlelh an man tak te hi Laldingliana (29), Serchhip Bazar Veng-a cheng nia insawi leh Rebecca Lalhmingmawii (35), Serchhip Chanmari Veng nia insawi te an ni a, Zirtawpni zan khan Thlam-ah hian riak hovin Mal-sawmkima leh Laldingliana te hi an inhnialbuai hnuah kut an inthlak niin an sawi a ni.

Pawikhawihtu nia hriat man an ni tih hriat a nih veleh Serchhip Chanmari Veng mi thahnem tak chu Moria tawngtaina ah hian an pung-khawm ve nghal a, Police te pawh hian an mi man hi phurchhuak lawk thei lovin YMA leh VC ten mipuite chu inbengdai tur leh pawikhawihtute chu Dan anga hremna pek an nih theihna tura tanho a tul thu te an sawi hnuah Police te pawhin an mi man hi him takin an chhuahpui thei a ni.