Latest News

Serchhip District-ah COVID-19 hri kai mi 3 hmuhchhuah leh an ni

Zirtawpni zan khan Serchhip District-ah COVID-19 hri kai hmuhchhuah mi pahnih (2) an awm leh a, heng mite hi Serchhip Tarpi Tlang-a COVID Care Centre-ah enkawl nghal an ni.
Hemi chungchangah hian Serchhip District Bawrhsap, Dr. Lalzirmawia Chhangte chuan thuchhuah siamin Zirtawpni zan-a Serchhip District atanga Positive hmuhchhuah mi 2 te hi Maharashtra State atanga rawn haw an nih thu leh, sawrkar in inkhunghranna hmun a siama inkhunghrang mek an ni tih sawiin, COVID-19 hri kai lanchhuah dan an neihloh thu leh insawiselna pawh an neihloh thu a sawi a, tun dinhmun ah ngaihtuahawm an nih loh thu leh COVID Care Centre, Serchhip-ah enkawl an nih nghal dawn thu a sawi bawk. Heti hian Serchhip District atangin COVID-19 hri kai hmuhchhuah mi pathum an awm ta a, a hma lama lo hmuhchhuah tawh mi pakhat chu ZMC-ah enkawl tura thawn niin tuna hmuhchhuah mi pahnih te erawh chu Serchhip-ah enkawl an ni thung.
Inrinni vek khan Serchhip District Bawrhsap hian thuchhuah siam nghalin, June 20, 2020 a RT-PCR test result chhuakah Serchhip District a mi pahnih, Govt. Serchhip College Academic Building a quarantine mek te chu COVID-19 positive an ni tih hmuhchhuah a ni tih tarlangin, hei vang hian mipuite kan lo him theih nan Regulation 11(1) of The Mizoram Epidemic Diseases (COVID-19) Regulations, 2020 in thuneihna a pek angin Govt. Serchhip College Academic Building chu Containment Unit-ah puangin a chhehvel ram, College Main Gate atanga College ramchhung chhuahlam hmun rin chin pawh Containment Zone-ah a puang nghal bawk a. Hetianga Containment Zone-a puan a nih tak avang hian helai hmun hi tlawhpawh phalloh a khar nghal niin luh leh chhuah pawh khap nghal a ni a, Govt. Serchhip College Academic Building pawh thu leh awm hma chu hman theihloha khar niin helai hmunah hian lirthei eng chi pawh veivah khap nghal a ni bawk a. Hei hian phalna pek bik te erawh chu a huamlo thung ang.
Hetihlai hian Serchhip District chhunga COVID-19 avanga inkhunghrang mek te chu an inkhunghran hun a zawh hnuah leh an Swab Sample te enfiaha a Negative hnuah RAT hmanga enfiah leh niin hri kai lo dinhmun a ding te chu nimin thleng khan chhuahtir zel an ni a, nimin khan Vantlang hmunhma leh Kohhran hmunhmaa inkhunghrang mi 33 leh sawrkar hmunhmaa inkhung-hrang mi 53 te chu chhuah tir leh niin tun dinhmunah In lama inkhunghrang mi 21, sawrkar hmunhma a inkhunghrang mi 101, Vantlang leh Kohhran hmunhmaa inkhunghrang mi 6 leh Isolation-a awm mi 8 chiah awm tawhin inkhunghrang hi an vaiin 136 chauh an awm tawh a ni.

Comments

Popular News (Last 30 Days)