Taxation Minister hovin Mizoram Tax Revenue Collection tihpun dan tur sawiho a ni

Nimin khan Taxation Minister, Lalchamliana hovin Taxation Department Officer ten COVID-19 hripui leng mekin Sawrkar sum dinhmun a nghawng dan thlir hovin, Tax Revenue Collection tipung tura hmalak dan tur an sawiho.
He sawihona Taxation Minister Pisa-a neih ah hian COVID-19 hripui a len avanga lockdown in kan ram ei leh bar leh sumdawnna a nghawng dan sawiho a ni a. Mizoram Sawrkar-in Tax (chhiah) a hmuhna tam ber chu Chhiah lakna bungrua hralhna atanga sumdawngten Goods and Services Tax (GST) an chhunluh a ni a. Lockdown avangin March thla tawp lam atanga Vawiin thlenga mumal taka sumdawnna kalpui theih a nih loh avangin April, 2020-ah phei chuan Chhiah hi cheng nuai 1435.16 (vbc 14.35) chiah a lut a. Taxation Minister kaihhruaina hnuaiah Taxation Department chuan Lockdown chhung khan theihtawp chhuahin, May 2020 chhunga Chhiah lut zat chu cheng nuai 4608.75 (vbc 46.08)-ah a pung chho a. Tun Sawrkar kumthar (2020-21) chhunga Chhiah lut tawh zat chu cheng nuai 6043.91 (vbc 60.44) lai a ni tawh a ni.
He hunah hian Taxation Minister, Lalchamliana chuan Hripui in min tibuai hle chung pawh a Taxation Department-a thawktute inpekna nasa tak avanga hmasawnna kan hmu chu lawmawm a tih thu sawiin, “Tax pek pawimawhna mipuiten kan lo hre telh telh a, Sawrkar Department dangte pawhin min hriatpui chho zel hi a lawmawm ka ti tak meuh meuh a. Chhiah pek hi Kohhran inrelbawl dan nen a inang deuh a; Kohhran member-te thawhlawm tel lo chuan Kohhran a kal thei bik lo ang hian khua leh tui ten Chhiah pek kawnga kan harh ang zelin ramin hmasawnna a hmu thin,” tiin District Council hunlaia chawmhlawm rilru put ang chi kha kan kalsan tak thu leh hei hi hmasawnna tha tak a nih thu a sawi bawk.
Taxation Department hi Mizoram Sawrkar tana sum la lut hnem bertu niin, kum 2018-19 khan State’s Own Tax Revenue pumpui cheng nuai 72669.97 (vbc 726.69) atanga cheng nuai 57888.30 (vbc 578.88) chu Taxation Department thawhchhuah a ni a, State’s Own Tax Revenue a Department thawhchhuah hi 79.65% zet a tling tihna a ni. Kum 2019-20 ah chuan Sawrkar-in Target cheng nuai 52179.06 (vbc 521.79) a tuk chu cheng nuai 14819.66 (vbc 148.19) laia khumin cheng nuai 66728.72 (Vbc 667.28) an khawn a ni.
Taxation Department Officer-te chuan kan hun tawn harsa tak karah ruahmanna tha tak siam a, Revenue dinhmun siamthat kawnga Minister in a Department a enkawl dan chu a lawmawm an tih thu an sawi a. Tax chhunluh kawngah sumdawngte leh contractor te thahnemngaihnaah an lawmthu an sawi bawk.

Comments

Chhiar Hlawhte