Chennai atanga Mizoram-a rawn haw te chhui zo tep

Health Minister, Dr. R. Lalthangliana chuan Chennai atanga lo haw, Tamil Nadu a tangkhang Quarantine Facility chhuahsan tawhte uluk takin chhui zui a tracing tih mek a ni tih a sawi.

Nimin a Pisa-a Committee on COVID-19 Psychological & Social Guidance leh Mental Health thut-khawm ah he thu hi sawiin Health Minister chuan thu belhchian dawllo leh thuthang leng vak mipui ti chi-ai thei thehdarh kawngah mipui kan insum a ngai tih sawiin, Chennai atanga lo haw, Tamil Nadu a Mizoram mi leh sa tangkhangte, quarantine hun zo tawh a chhuah zalente chu fimkhur thu hla ah Mizoram sawrkarin Swab Sample lak sak a RT-PCR a test turin a chhui mek tih a sawi a, a chanve vel an thawk zo tawh a ni, a ti.

Chennai atanga rawn haw te chungchang ah mipuite a hlauhthawnna a awm ni a lang chu Health Minister chuan sawrkarin a tih tur a hria a, sawrkar hmalakna a rintlak tawk a ni tih a sawi a, thlaphang lo turin mipuite a chah a. ZMC Laboratory-ah Automated RNA Extractor pahnih chu a hman theih dawn hnai nia a lan thu leh enchhinna pawh uluk taka kalpui mek a ni tih a sawi a. Haua & Sons ten sum an thawh hmanga lei RT-PCR khawl pawhin nimin khan Aizawl a rawn thleng tih a sawi bawk.

He hunah hian Committee on COVID-19 Psychological & Social Guidance leh Mental Health on COVID-19 Team te chuan inkhung-hranna hmun hrang hrang an tlawh thin thu leh khunghran mek te nen pawh hun tha tak an hman thin thu an sawi a. Quarantine mekte harsatna tawh zirchianna turin questionnaire an siam thin thu sawiin, Quarantine Facilities chungchangah Sawrkar inbuatsaihna a tha tawka an hriat thu an sawi a. Quarantine a awm mekte tana hrehawm leh hriat nuamlo, an rilru hrehawmna belhchhah tura pawnlam atanga Social Media kaltlanga thu leng vak awm thin chu pawi an tih thu an sawi bawk.