State Level NSS Advisory Committee thukhawm

State Level National Service Scheme (NSS) Advisory Committee Meeting vawi 16-na chu nimin khan Sports Minister, Robert Romawia Royte hovin a Pisa-ah neih a ni.
He thutkhawm ah hian Sports Minister chuan Sports hmasawnna bakah thalaite hmakhua leh hmasawnna ngaihtuah chu Sports & Youth Services Department mawhphurhna a ni tih sawiin, hun rei tak Department chhungah pawh Youth Services lamin ngaihthah a hlawh tih a sawi a, tun atang chuan theihtawp chhuaha tanlak a tul thu a sawi bawk.
Sports Minister chuan Mizoram NSS-a thawktute leh Zirna In hrang hranga NSS Programme Officers te leh Volunteers te hmalak dan leh hnathawh chu India ram huap pawha chhuan tlak a nih thu sawiin, Mizoram tlawmngai pawl thisen pe thinte zinga thisen pe tam ber nihna a kum zawna a la chu Department tan pawh inchhuanna tur tha a nih thu a sawi a. NSS volunteer ten mi dangte tana thisen pek an intihhmuh a, an uar zel theih nan 'Sports Minister Trophy for Blood Donation' siam tura rel niin, Higher Secondary School Level tan Trophy leh Tangkafai cheng nuai khat leh College & University Level tan Trophy leh tangkafai cheng nuai khat lawmman siam nise an ti bawk.
He hunah hian kum kalta chhunga an hmalakna te tarlan niin NSS hian Voluntary Blood Donation Camp vawi 65 neiin thisen Unit 5676 pek a nih thu te, thing tiak 2910 lai an phun thar thu te, Mizoram chhungah mipui vantlang hman turin Zun In 12, Public Water Point 8, Waiting Shed 7, Public Bathroom 2 leh Public Benches 7 an siam thu bakah faina hnatlang beihpui vawi tam tak an neih thu te, India ram chhung leh ram pawnah programme pawimawh National Integration Camp, National Youth Festival, Tribal Youth Exchange Programme neih a nih thu te tarlan a ni.
Nimin vek khan National Insfrastructure Pipeline Scheme hnuaia Sports Infrastructure Projects siam dan tur te sawi hovin Sport Minister, Robert Romawia Royte Office-ah Sports Department Officers Meeting neih zui a ni a. He thutkhawm ah hian Sports Minister, Robert Romawia Royte chuan India rama Khelo India Centre of Exellence pariat (8) dinna tur thlanchhuah zingah Aizawl chu a tel ve thu a sawi a, Union Minister, Kiren Rijiju leh Central sawrkarin Mizoram a ngai pawimawh chu lawmthu sawiin, Zoram infiammi te tan hmasawnna nasa tak a thlen ngei a rin thu a sawi bawk.
He Meeting-ah hian National Infrastructure Pipeline Scheme hnuaia Sports Infrastructure Projects hrang hrangte leh Externally Aided Project atanga hna kalpui dan turte an sawiho bawk a ni.

Comments

Chhiar Hlawhte