Serchhip District-ah PPE leh COVID-19 kai enkawlna damdawi a tam tawk

Serchhip-a Health Department-a thawk te chuan Personal Protective Equipment (PPE) chu an ngah tawk tih sawiin, Serchhip District chhunga a hmatawnga thawktu (frontline worker)-te tan hmanraw hman turah thlaphanna tur a awm rihlo tih an sawi a. Amaherawh chu PPE te hi renchem taka hman mek a nih thu an sawi bawk.

Mizoram-ah COVID-19 a darh zel avang leh he hri leng avanga mamawhna sang em em, Personal Protective Equipment (PPE) chung-changah nimin khan kan Palai chuan Serchhip-a Health Department-a thawk te biain Health Department-a Store nghaktu R. Sanghmingthanga, Pharmacist chuan tun dinhmunah PPE hi an ngah tawk thu sawiin, chutih rual chuan enge kan tawn zel dawn tih hriat a nih loh avangin an hmanraw neih te chu renchem deuhin an hmang tih a sawi a, chutihlai chuan a tula hman turah chuan pekchhuah char char a ni tih a sawi bawk. 

Tun dinhmunah PPE Suit 169 neiin N95 Mask pawh 50 an neih bakah 3 Layer Mask pawh 1286 an neih thu sawiin, tuna PPE Suit an neih ah hian Shoe Cover tel nghal vek mah se a hranin Shoe Cover 27 an neih thu leh Goggles pawh Box 4 neiin Box tinah hian 12 zel a awm thu an sawi a. Vanduaithlak taka Serchhip-a COVID-19 positive enkawl ngai an awm palh a nih pawhin a enkawlna atana hman thin damdawi pawh an ngah tawk rih thu a sawi bawk a. Heng bungrua an neih bakah hian COVID-19 avanga harsatna kan tawh tirh khan DM&R Department kaltlangin bungrua engemaw zat an lei belh tawh thu an sawi bawk.

Health Department-a thawktute chuan PPE te hi RAT Sample lak nan te, Swab Sample lakna atan leh Infection Control Team te bakah mamawhna dang dangah te hman ve reng a nih thu an sawi a. State pawna tangkhang lo haw te Sample laksak thintu Lab. Technician zinga pakhat chuan tunah hian Team 2 anga an chhuah thu leh PPE hi a thar zel an hak thin thu sawiin, chutihrual chuan beisei loh thil a thlen palh theih thu leh chutiang hunah chuan PPE lamah harsatna an neih lohna turin COVID-19 Symtom neilo te Sample lakna atana an hman PPE te chu ni 7 chhung Chlorine-a chiahin engemaw thulha hman tura an dahthat thu a sawi a. Amaherawh chu Symtom nei te Sample lakna atana an hman te erawh chu halral nghal zel a nih thu a sawi bawk.