Serchhip District-ah Lockdown kalpui dawn; Town chhung inkaihhruaina siam a ni

Mizoram puma inkharkhipna, Total Lockdown kalpui mek chu Serchhip District-ah pawh June 30, 2020 thlengin kalpui chhunzawm a ni dawn a, hemi chungchangah hian nimin khan Serchhip District Bawrhsap chuan hriattirna tichhuakin Serchhip khawpui chhunga Total Lockdown kalpui dan tur pawh tihchhuah nghal a ni.

Nimin khan Serchhip District Bawrhsap leh Serchhip District Disaster Management Authority-a Chairman ni bawk, Dr. Lalzirmawia Chhangte chuan thuchhuah siamin tun thla ni 30 thleng Total Lockdown kalpui a nih leh tur thu hi a tarlang a. He Lockdown kalpui chhunzawm dan tura ruahmanna siam te chu zawm vek tura mipuite chu hriattirin, zan lam dar 7:30 atanga zing dar 4:30 thleng pawnchhuah khapna Vantlang hmun leh hnathawhna hmuna vawikhat-a mi panga (5) aia tam punkhawm khapna te chu ala ding reng tih a tarlang bawk.
Serchhip Town chhunga Lockdown kalpui dan tura ruahman tarlan zingah hian Serchhip District mi leh sa, Lockdown avanga State pawn a tangkhang lo haw turte chu Serchhip DC hnenah in report tur niin Serchhip Town Area atanga bungraw thiarchhuak leh lalut turte chuan DC hnenah phalna lak tur niin hei hian Essential Commodities phur te chu a huamlo thung a, Serchhip Town Area-ah nitin mamawh (Essential Commodities) zawrhna dawr, Eichawp dawr (wholesale leh retail), Veng tin-a Dawrte, Supply Retailer (Fair Price Shop), mihring leh ran damdawi dawr leh clinic, thlai chi leh leitha zawrhna, kuthnathawktute hmanraw zawrhna, ranchaw zawrhna leh bungraw phur mamawh Oil, Spare Parts leh hnathawhna atana mamawh - Brick, Cement, Rod leh In sakna bungraw zawrhna dawrte chu Deputy Commissioner leh VLTF te ruahmanna siam angin hawn theih a ni anga. Mimal eizawnna hna (Cottage & Home Based Industrial units)- Puanthui, Puantah, Carpentry, Fabrication, Bakery leh a dangte chu phalna hranpa lak ngai lovin kalpui theih a ni a. Amaherawhchu heng hnate hi mahni In-ah thawk lova dawr hawn phal a ni lo thung.
Bawrhsap thuchhuah tarlan danin mipui in awlsam zawka Sa, Thlai leh chawhmeh an hmuh theih nan Veng hrang hrangah VLTF ten ruahmanna an siam anga, Inneih, inkhawm leh mitthi vuina-ah mi 35 aia tam punkhawm khap niin hei hi Kohhran leh khawtlang hruaitu ten khauh taka kalpui tura beisei a ni. VLTF te chu mahni veng theuhah duty tur niin, tul bik thilah chuan Movement Permit pawh pek tur a ni a. VLTF te hi vawikhatah mi panga (5) aia tam duty tur a ni lova, duty-na hmunah Social Distancing kenkawh tur niin kum 60 aia upate duty loh tur a ni ang.
Inkharkhipna kalpui a nih lai hian Ser-chhip Town Area-ah tumahin mahni In leh compound an chhuahsan tur a ni lo tih Bawrhsap chuan tarlangin, lirthei hmanga mipui chetvel pawh khap tlat a ni a. Commercial vehicles (Maxi Cab, Taxi, Auto Rickshaw, Pik-up etc) te pawh tlanchhuah phal a ni lova, hei hian phalna pek bik hrang hrangte a huam dawn lo a ni.
Serchhip Town Area atanga luh leh chhuah (zin veivah) khap zui zel niin tul bik thil leh Emergency a veivah ngaite chuan VLTF te kaltlangin Deputy Commissioner phalna lak tur a ni a, District pawna veivah ngaite tan mCOVID-19 mobile application-ah mPASS hmangin dilna siam tur a ni a, he dilna hi VLTF ten an hriatpui ngei tur a ni thung a. Mihring veivahna permit chu tul bik thilah VLTF-te'n pein Lirthei chhuak tur reng reng - Feh tur, Dawr-a kal tur, Petrol la tur, Office dawr tur leh a dangte'n mCOVID-19 mobile application-ah mPASS hmangin dilna an thehlut anga, District Hqrs. atanga feh turte chuan zing dar 4:30 leh 7:30 inkarah khawpui an chhuahsan fel hman tur a ni bawk a. Chhiatrupna thlen hlauhawm avanga In sak chhunzawm leh hnathawh chhunzawm ngaite chu VLTF te hriat-puina leh rem tihnain thawh theih a ni ang.

Comments

Chhiar Hlawhte