Sample 104 thawn tawh

COVID-19 kaihhnawih ah nimin thleng khan Serchhip District atangin ZMC-ah Swab Sample 104 thawn ni tawhin result hriat tawh chinah COVID-19 kai hmuhchhuah an la awmlo.

Serchhip CMO Office atanga thu kan dawn danin COVID-19 hri len tan tirh atang khan COVID-19 hri kai nia rinhlelh te Swab Sample chu thawn thin niin tunhnaia a runpui-a rawn haw te rawn thlen hma zawng khan Sample 17 thawn hman a ni a, tunhnaia a runpui-a rawn haw an awm hnuah niminpiah khan Sample 62 thawn leh niin nimin khan Thenzawl atangin Sample 25 thawn leh a ni bawk a, heng Sample thawn thar te hi a result erawh hriat theih ala ni lo thung a, Sample thawn tawh result hriat tawh chinah erawh hri kai hmuhchhuah an la awmlo a ni.

Serchhip CMO Office-a thawk te chuan Swab Sample te hi uluk taka lak a nih hnuah an Office atanga kal tur inruatin an Motor hmangin an zuk dah thlap thin tih an sawi a, Mizoram hmun hrang hrang atanga Sample te hi lak-khawm ve reng anih avangin result hi hriat nghal zung zung theih a nih loh thu leh tunhnaiah Positive an hmuhchhuahna District te chu enfiah hmasak-ah neih an nih thu an sawi a. Tunhnaia Mizoram pawn atanga rawn haw te chu an zavaiin an Sample lak vek zel tawh tur a nih thu leh Quarantine Centre-a an awm chhungin an Sample hi enfiah hman vek tura ruahman a nih thu an sawi bawk.