Latest News

Inkharkhipna kalpui mek chungchanga hmalak dan tur Serchhip-ah sawihona neih a ni

Nimin khan Serchhip-ah Addl. DC, HD. Lalpekmawia hovin Serchhip khawpui chhunga Village Level Task Force (VLTF) te chuan inkharkhipna kalpui meka hmalak dan tur sawihona an nei a. Hri leng mek laka mipuite kan him theih nan sawrkar in inkharkhipna kaihhruaina a siam te chu khauh taka kenkawh a tul thu tarlan a ni.

Serchhip DC’s Meeting Room-a he sawihona hunah hian Addl. DC, HD. Lalpekmawia chuan COVID-19 positive pung hluai palh thei kan nih avangin VLTF te chu an inthlahdah a thianglo tih a sawi a. District Task Force lam atanga fuih thar reng nghak lovin, kan zaa kan him theih nana ding kan ni tih hriaa kan tan tlan a tul thu a sawi a. Lockdown thawh 5-na atana inkaihhruaina kan neih mek te anihna anga kalpuia, mipui ti chi-ai lo leh thudiklo avanga chi-aina thleng thei laka zirtirtu leh kaihruaitu nih a pawimawh thu a sawi bawk. Addl. DC chuan sawrkar in inkaihhruaina a siam ah mi 5 aia tam awmkhawm phalloh tih te, Mask vuah lova khawlai chhuah khap te leh Social distancing tha tak kengkawh tura duty te a tul  thu sawiin, vantlang aurinna hmanga mipuite hriat tura hrilhhriat thar fo te pawh a tul thu a sawi a, mahni huamchhung theuha khauh taka sawrkar in inkaihhruaina a siam te kalpui turin he huna tel VLTF aiawhte chu chahin Lockdown inkaihhruaina in a sawi angin  Bazar area a mamawh lam mipui kal an tam lutuk loh nan VLTF ten mahni area theuh ah an remchan dan anga Chawhmeh zawrhna hmun siam turin a ngen bawk.
He hunah hian Sub-Deputy Commissioner, Denny Lalchhuanmawia pawhin kan hlauh ber hi kan hriat chian a ngaih thu leh kan fimkhur thiam a ngaih thu sawiin, “Kan him tlan a, kan that tlan nan dan anga fir taka kal a ngai a. DC Office atangin Order a awm emaw, awm lo emaw, VLTF ten hmalakna tur kan ngah a, Dan hnuaia thuneihna kan neihte hriain, thlei bik nei lova hma kan lak thar a ngai a ni,” tiin thahnem ngaih a tul thu a sawi bawk.
He sawihona hunah hian Serchhip khaw-pui chhunga VLTF hrang hrang aiawhte telin an huamchhunga an hmalakna hrang hrangte sawiin, DC Office atanga hmalak sak an mamawhna lai te pawh sawiho a ni a. Sawrkar in ruahmanna a siam anga In lama inkhunghranna kalpui dan te pawh he hunah hian sawiho a ni bawk.

Comments

Popular News (Last 30 Days)