Mizoram-a zirna In hrang hrang te July 15, 2020 atangin hawn leh tum a ni

Inkharkhip kalpui avanga School Academic Session tan theihloha awm mek chu thla thar July 15 atang khian tan leh tura ruahman a ni.
Nimin khan School Education Minister, Lalchhandama Ralte hovin School Education Department hotute bakah Central YMA, Zirtirtu pawl hrang hrang, MZP leh MSU hruaitute bakah Independent School Owner Association hruaitute chu thukhawmin School Academic Session tan hun tur sawiho a ni a, July 15, 2020-ah School Session 2020-21 tan nise tiin June 22, 2020-ah Class XI tan Admission hawn nise tih rel a ni bawk. School luh tan hun tura ruat July 15, 2020-ah hi chuan quarantine-na atana hman School building-te pawh tih ruaha naupang kalna tlaka tihthianghlim hman beisei a ni tih sawilan a ni a. Minister hova Meeting-ah hian tun Academic Session hi Session kal lai April 2020-March 2021 chhunga zawhfel hman tura ruahmanna siam nise, School Calendar thar pawh duan nise, tih a ni a. Ram dinhmun enin naupang te zual lam luh hun tur chu a tul anih chuan ngaihtuah that leh theih tura dah a ni.
Meeting-ah hian School luh theih hun chu tlai deuh tawh mahse, Elementary te tan Sessional Work Plan siam a ni a, zirchhuah tur a awm sa vek bawk a, zirlai chapter pakhat mah paih lovin kalpui theih beisei a ni tih report a ni a, Chapter khat zir chhung chu a hma aia rei lo deuh an zir anga, exercise te pawh an titlem deuh mai dawn niin sawi a ni. Secondary zir tur chin pawh ruahmanna siam lawk vek anih thu report a ni a, Higher Secondary tan erawh chuan NEET/JEE exam la hmachhawn leh tur annih avangin CBSE kalpui dan enin ruahmanna siam a tul thu sawi a ni bawk.
He thutkhawm ah hian School Education Minister chuan Central Board of School Education (CBSE) leh Council for the Indian School Certificate Examination (CISCE) ten July thlaa Class X leh XII Exam an neih hunah Mizoram-a rawn haw tawh Mizo zirlai 100 bawr velte tan HRD Minister leh Chief Executive & Secretary CISCE hnenah Aizawl-a an exam chhunzawm theih nan lehkha a ziak tih a sawi a. A hmalakna hian rah duhawm tak chhuahin Chief Executive & Secretary CISCE chuan chhanna a rawn thawn a, CBSE exam pawh mahni home state theuha Exam theih turin thuchhuah a ni tih a sawi a. CISCE Exam Centre atan hian Govt Mizo High School chu thlan a ni a, Officer Incharge-ah Lalrinpuii, Under Secretary chu ruat a ni a, Exam Superintendent atan Hmingchungnunga, Headmaster Govt. Mizo HS chu ruat a ni tih a sawi bawk.

Comments

Chhiar Hlawhte