Mizoram-ah mi 7485 hruai haw ni tawhin State pawn mi in Mizoram an chhuahsan bawk

Mizoram mi leh sa State pawn-a tangkhang hruai haw mekah May thla tawp thleng khan State 6 atangin Mizo tangkhang mi 4608 te chu Rel hmanga hruai haw an ni tawh a, Vairengte kaltlangin mi 2943 hruai haw an nih tawh bakah nimin khan Goa atangin mi 734 te chuan Mizoram an rawn thleng leh bawk.
Rampum-a inkharkhip kalpui a nih avanga Mizoram mi leh sa hruaihaw hna thawh mekah hian State lian deuh leh mihring tangkhang tamna deuh ah chuan Rel hmanga inhruaihaw niin tun thlengin heng mite rawn haw-na tura ruahman, Special Train chu Bairabi-ah a vawi nga rawn thleng tawh a, Telangana chu rawn haw hmasa an ni a, mi 474 hruai haw niin, hemi hnu hian Karnataka atangin mi 1452, Gujarat atangin mi 289, Madhya Pradesh atangin mi 223 leh Delhi & Haryana atangin mi 1436 te hruai haw leh an ni a. Nimin khan Goa atangin mi 734 rawn thleng lehin Special Train hmanga rawn haw tawh zawng zawng hi mi 4608 nia chhin-chhiah an ni a, Vawiin-ah Maharashtra atangin mi 1550 rawn thleng leh tura beisei an ni bawk.
Hetihlai hian State hrang hrang atanga Motor hmanga rawn kir pawh an awm deuh reng a, heng mite hi Vairengte kaltlang-a rawn lut niin May thla tawp thleng khan mi 2943 an rawn kir tawh a, heng te hi Aizawl District mi 1327, Lawngtlai District mi 334, Siaha District mi 452, Lunglei District mi 272, Kolasib District mi 171, Serchhip District mi 98, Champhai District mi 102, Mamit District mi 62, Saitual District mi 44, Khawzawl District mi 51 leh Hnahthial District mi 30  te an ni. Heti hian hriat theih chinah State pawn lama awm Mizoram mi hruaikir hi mi 7551 an tling tawh a ni.
Mizoram mi leh sa, State pawn lama tangkhang te hruai haw an nih mek lai hian State pawn lam mi, Mizoram-a tangkhang te pawhin Mizoram an chhuahsan ve mek bawk a, heng State pawn lam mi tangkhang te hian hun engemaw chen haw-na tur mumal an neihloh hnuah nimin-a Goa atanga Mizoram mi tangkhang rawn haw te chuanna hmangin mi 1290 chuan Mizoram an chhuahsan a, heng zinga tam ber hi Jharkhand mi an ni. Heti hian Mizorama tangkhang mi 2,284 zinga mi 259 te chu an khaw lamah hruai haw an ni tawh a, tunah hian Mizorama tangkhang mi 2,025 an la awm mek ni a hriat a ni.

Comments

Chhiar Hlawhte