Mizoram-ah COVID-19 kai enkawl dam 30 awmin Hri kai zaa 20.68 enkawl dam an ni tawh

Mizoram-a COVID-19 hri kai hmuhchhuah zingah mi 30 te chu enkawl dam ni tawhin damdawi In atanga chhuahtir an ni tawh a, Vawiin lamah pawh damdawi In atanga chhuak thei tur awmin niminpiah a Sample enfiah zingah hri kai hmuhchhuah thar an awmlo thung.

Mizoram Sawrkar thuchhuah tarlan danin Mizoram-a COVID-19 hri kai enkawl mek zingah nimin khan mi 6 te chu enkawl dam an nih hnuah damdawi In atanga chhuahtir an ni a, heng mite hi ZMC-a enkawl Aizawl District mi 2 leh Kolasib District mi 3 bakah Khawzawl District-a enkawl mi pakhat te an ni a. Lawngtlai District-a hri kai hmuhchhuah tawh mi 8, mipa 6 leh hmeichhia 2 te chu an Sample enfiah a nih hnuah an Negative avangin dam-ah puan niin Vawiin lam hian damdawi In atanga chhuahtir an ni bawk ang.

Chhinchhiahna atanga a lan danin Mizoram-ah COVID-19 hri kai hmuhchhuah mi 145 awm tawhin mipa 68 leh hmeichhia 77 te an ni a, an zinga mi 30 te chu enkawl dam niin enkawllai mi 115 an la awm a, hri kai hmuhchhuah zingah zaa 20.68 te chu enkawl dam an ni tawh a, vanneihthlak takin nunna chan an la awmlo thung a ni. Hri kai hmuhchhuah zingah Aizawl District mi enkawl dam tam berin mi 13 an dam tawh a, Kolasib District mi 10 leh Champhai District mi 4 bakah Mamit, Khawzawl leh Saitual District atangin mi pakhat theuh enkawl dam an ni tawh a. Lunglei District-ah hri kai enkawllai la tam berin mi 45 enkawl mek an ni a, Aizawl District-ah mi 22, Mamit District-ah mi 17, Siaha District-ah mi 9, Lawngtlai District-ah mi 8, Champhai District-ah mi 4, Serchhip District-ah mi 3, Khawzawl leh Saitual District-ah mi 2 ve ve leh Kolasib District-ah mi pakhat enkawl mek an la ni.

Niminpiah khan ZMC Laboratory-ah Swab Sample 1157 enfiah niin heng te hi  Aizawl, Lunglei, Siaha, Kolasib, Serchhip, Lawngtlai Mamit leh Khawzawl District bakah State Referral Hospital Falkawn-a enkawl lai te, West Bengal leh Bihar mi, Mizoram-a Quarantine lai te niin heng atang hian hri kai hmuhchhuah an awmlo thung a ni.  

Mizoram-ah hian nimin thleng khan mi 11,672 te Swab Sample chu enfiah a ni tawh a, heng zinga a tam ber chu ZMC-a enfiah niin mi 11,426 enfiah an ni tawh a, Lunglei-a Truenat-PCR hmangin mi 188 enfiah ni tawh bawkin RAT hmangin mi 16,418 enfiah an ni tawh bawk.

Hri kai zinga 57.42% enkawl dam an ni tawh :

Nimin thleng khan India ramah COVID-19 kai hmuhchhuah mi 4,73,105 tling tawhin hri kai hmuhchhuah atanga za zela 57.42 te chu enkawl dam an ni tawh thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 2,07,871 enfiah niin heng atang hian hri kai hmuhchhuah thar 16,922 an awm leh a, heng mite nen hian tun thlenga hri kai hmuhchhuah chu mi 4,73,105 an tling tawh a, heng zingah hian mi 2,71,696 te chu enkawl dam ni tawhin hei hi za zela 57.42 niin hri kai enkawl mek 1,86,514 an awm thung a, hri kai enkawl mek aiin enkawl dam hi 85,182 in an tam zawk a ni. Hetihlai hian hri kai zingah nunna chan mi 14,894 an awm tawh bawk a, hei hi hri kai hmuhchhuah zawng zawng atangin zaa 3.14 an tling a ni.

India ramah hian kumin January thla khan COVID-19 enfiahna Laboratory pakhat chiah awmin hri leng avanga harsatna a thlen hnuah Laboratory hi din belh zelh a ni a, tunah chuan 1000 zet awm tawhin heng te hi Sawrkar Laboratory 730 leh Private Laboratory 270 niin ICMR chhinchhiahna danin India rama Sample enfiah tawh zawng zawng zat chu 75,60,782 a ni bawk.