Chief Minister in Zoram Medical College a tlawh

Chief Minister, Zoramthanga chuan nimin chawhnu khan Zoram Medical College (ZMC) tlawhin thawktute nen an inkawm a, COVID-19 hrileng karah doctor-te chu ral hmatawng an nih thu sawiin, “Mizoram in kan chhuang hle a ni,” a ti.
ZMC a tlawhna ah hian Chief Minister chuan COVID-19 kai hmuhchhuah thar chu eng hunah emaw chuan thleng tura rinlawk a nih thu sawiin, chutihrual chuan he hrileng kan hriat tirh ai chuan kan inpuahchahna te tha in, lo dawnsawn dan te pawh kan thiam tawh thu a sawi a. Sample positive an confirm veleh enkawlna mumal takin rang takin an che nghal chu lawmawm a tih thu leh natna vei te pawh an damchhuah thuai a beisei thu a sawi bawk.
Chief Minister chuan tun dinhmunah chuan mipui hriselna chu an ngaihpawimawh lian a nih thu leh COVID-19 doletna atana mamawh hrang hrang chu sawrkar pawhin ui lovin a tul angin a pek zel thu a sawi a. Mipui pawh tangrualin COVID Fund-ah puih ngaite puihna turin an thawhkhawm thu a sawi. Chief Minister chuan ZMC tihchangtlun chungchangah tun dinhmunah chuan natna hrileng avangin phai lam atanga endiktu lo kal tur te pawh an lo kal theihloh phah a, mahse chuti chung chuan theihtawp chhuahin tlin ang angin hma lak chhunzawm zel a nih tur thu a sawi bawk.

Comments

Chhiar Hlawhte