Chief Minister in COVID-19 Dashboard a tlangzarh

Nimin khan Mizoram Science, Technology & Innovation Council (MISTIC) Governing Body chu an Chairman Chief Minister, Zoramthanga hovin CM Conference Hall-ah an thukhawm a. MIRSAC (Mizoram Remote Sensing Application Centre) in Mizoram chhunga GIS behchhan a siam COVID-19 chungchang data tarlanna COVID-19 Dashboard covid19-mizoram-mirsacmizoram.hub.arcgis.com/ an siam chu Chief Minister hian a tlangzarh nghal a ni.

He COVID-19 Dashboard hi GIS software siamtu company lian ESRI company nena tangdun a siam a ni a. Mizoram-ah chuan GIS behchhan a COVID hrileng chanchin tarlanna web portal hmasa ber niin Quarantine Centre, Critical Facility, COVID Case support leh data pawimawh hrang hrang, District bil leh State pum, ram pum leh khawvel dinhmun te en theih a ni.

MISTIC chuan COVID-19 hrileng karah mipui him theihna turin kawng hrang hrangah hma lo la tawhin, Laboratory-ah Hand Sanitizer siamin, heng an Hand Sanitizer siamchhuah hi Local Task Force, sawrkar hnathawk duty leh mamawhtu dangte hnenah pek thin a ni a. Hrik inkaichhawn theihna tlem thei zawnga kut hmanga herh haw ngailo kut silna, Foot Controlled Water Tap te siamin, COVID-19 chungchang inhrilhfiahna booklet te an lo siam tawh a. Hand sanitizer siam dan inzirtirna Mobile app te pawh lo siam tawhin, tunhnaiah RT-PCR khawl hman tur Mizoram in a neih belh theih nan IBSD atangin khawl pakhat hawh tura hma lo la in, June ni 5 khan lo thlengin ZMC ah dah a ni bawk.