Dy. CM in ‘Mizoram chhung Urban Area-a Quarantine Waste kalpui dan tur’ a tlangzarh

Deputy Chief Minister leh UD&PA Department changtu, Tawnluia chuan June atanga August thla chhunga hman tur ‘Mizoram chhung Urban areas-a Quarantine Waste kalpui dan tur’ chu Mizoram khawpui 23 (23 census towns) a hman turin a tlangzar.

Deputy Chief Minister Pisa-a he hun hmanna ah hian Deputy Chief Minister, Tawnluia chuan Mizoram leh khawvel in hun khirh tak a tawh mekah Mizoram Sawrkarin a tum bulpui ber chu COVID-19 laka mipuite damkhawchhuahna (survival) a ni tih sawiin, he hun khirh tak kan paltlang theihna turin sawrkar, Kohhran, Tlawmngai pawl leh mipui tanrual chhunzawm zel a pawimawh thu a sawi a. “Hripui dona ah hnehtu kan nih theih nan i tang tlang zel ang u,” tiin Mizoram mipuite chu a sawm bawk.

UD&PA Department hian tunlaia hripui leng karah Mizoram sawrkar chuan theihtawpin bawlhhlawh sawngbawltu (Sanitation Workers) te himna tura inven theihna kawng hrang hrang a ngaihtuah sak reng a. Hemi kawnga chak lehzuala hmalak a nih theihna turin Swachh Bharat Mission (Urban) kaltlangin he ruahmanna hi siam a ni. He package-ah hian khaw 23-a bawlhhlawh sawngbawltu (sanitation workers) ten hripui leng mek kara faina leh thianghlimna kawnga invenna atana an mamawh tur hrang hrang kim taka dahkhawm a ni a. Hetah hian ‘Mizoram chhung Urban Areas-a Quarantine Waste kalpui dan tur inkaihhruaina’ (Standard Operating Procedure) felfai tak duan a ni a. He inkaihhruaina ah hian Sawrkar hotute, Village/Local Level Task Force leh bawlhhlawh sawngbawltute (Sanitation Workers) zawm tur kaihhruaina mumal tak chhawpchhuah a ni.

June atanga August thla chhung tla tura chhut bawlhhlawh sawngbawltu (sanitation workers) te invenna tur hmanraw chikim- Hmai tuamna, kutkawr, PPE Gown, pheikhawk tuamna leh kut tihfaina (hand sanitizer) te pek an ni a. Inkhunghrang (quarantine) te hman tur bika duan bawlhhlawh ip eng (Yellow Garbage Bag) pawh heng khaw 23-a indahhrang awmna zawng zawng, mimal In emaw sawrkar leh khawtlang indahhranna hmun bika hman turin ruahman vek a ni bawk. Heng bawlhhlawh (quarantine waste)-te chhinchhiahna tur hian a bika siam bawlhhlawh bawm engah hian sticker pawh bel vek a ni a. Bawlhhlawh phur lirtheite phuh faina turin natna hrik that thei bawlhlo (disinfectant) khaw tin mamawh tawk ang zelin pek an ni bawk.

Bawlhhlawh sawngbawltu (sanitation workers) te hman tur Mask hi Mizoram chhunga thui leh siam vek a ni a. WHO duhdan ang taka siam a nih bakah pack dawnah sanitize vek niin, Bio-Degradable Material hmanga pack vek a ni bawk a. Hei hi Mizoram sawrkarin PPE Mizoram chhung ngeia siamchhuah (local product) chawikanna tura a hmalakna ‘Committee for Promotion of Locally Manufactured Protective Gears’ atanga lei a ni.