Latest News

MZU Southern Campus hmun tur sawihona nei

Mizoram University (MZU) Southern Campus hmun tur Mausep, Pukpui ram chungchang sawihona chu nimin khan Mizoram Youth Commission (MYC) Chairman, Dr. Vanlaltanpuia MLA hovin neih a ni.
Lunglei Land Revenue & Settlement Office-a he sawihona hunah hian Lunglei Settlement Officer, C. Laltleipuii bakah Officer leh Surveyor engemawzat telin, Pukpui VC Member te an tel bawk a, MYC Chairman chuan Mizoram University Southern Campus chu Mizoram mipuite, a bik takin chhim lam District-te tan malsawmna ropui tak a ni tih sawiin, Campus leh building tha leh changtlung tak din ngei anih theihnan sawrkarin theihtawp a chhuah zel dawn a ni, a ti a. He hmalakna ah hian mipui, khawtlang hruaitute leh NGO Coordination Committee-te tawiawmna leh finchhuahna a ngen nghal bawk.
He Meeting-ah hian Campus hmun tur Survey an lo neih tawh report ngaihthlak niin he meeting hian ram humhalh Tlawng Lui Riverine Reserved Forest Area te ngun zawkin Surveyor leh Pukpui VC ten lo enfel sela, ram 500 acres a zau tur ruahmanna lo siam se tih a ni. MZU Southern Campus tur hi teh fel a nih veleh Higher Education Funding Agency (HEFA), Govt. of India, Ministry of Human Resources Development, Delhi-ah thawn nghal a ni anga, an ni hian sum an rawn pe dawn a ni.

Comments

Popular News (Last 30 Days)