Latest News

MPCC in Assembly Speaker bang turin an phut

Mizoram Pradesh Congress Committee (MPCC) chuan Mizoram Assembly Speaker, Lalrinliana Sailo chuan Speaker dinhmun zahawm tak a chelh hnuah party tan lam a tihlan nasat lutuk avangin tum engemaw zat a zahawmna a humhim zo lo ni a puhin, a nihna bansan turin an phut.
Nimin-a thuchhuah an siamah MPCC chuan Assembly Speaker chu party tan bik nei lova MLA-te hokhawmtu tur, Assembly rorelna kaihruaitu tur, Democracy rama chanvo pawimawh ber pakhat a nih laiin, Assembly Session-ah eptu Party-te nuiza siam nan vawi tam tak a hmang tawh a, mei nei takin vawi tam a tawng tawh niin an sawi a. Speaker berin a party telna a tanzia a tihlan nasat chuan ram rorelna a kal dik thei ngai lo ni a sawiin, Speaker chu thlei bik nei lo va MLA-te rorelna kaihruaitu tur, MLA-te ngaihdan lakhawm a, a tam zawk ngaihdan anga rorelna kaltlang-puitu tur a ni, an ti.
Tunhnaia Speaker hova MLA rual inkhawmnaa MLA-te thusawi an thusawi lai nen a ngial a nganin TV-ah tihlan a ni tih sawiin, hei hi Assembly Committee kalphung pawh a nih loh avangin Speaker berin thil phiarruk nei sa ranin inkhawm a ko nia an ngaih thu MPCC chuan an sawi bawk a. Media mite hmaah MLA thenkhatte zahawmna nasa taka tihmualpho tumin, Mizoram mipui hriat theih turin zahlo takin eptu party-te chungchang sawiah an puh a. A kaihhruaina hnuaia an thutkhawmna a MLA-ten an ngaihdan an sawite thlengin Media hma-ah amah berin a sawichhuak a, hei hian Assembly Speaker tlak a ni lo tih leh Speaker dinhmun zahawm tak timualphotu a nihzia a tarlang chiang hle tih MPCC thuchhuah chuan a tarlang a. Mizoram Legislative Assembly Speaker, Lalrinliana Sailo chu Speaker ni tlak loah ngaiin, a rang thei ang bera Speaker a nihna bansan turin an phut tih an thuchhuah chuan a tarlang bawk.

Comments

Popular News (Last 30 Days)